Kryeministri Edi Rama mbajti fjalimin e tij në Asamblenë e Kombeve të Bashkuara të OKB-së.
Rama u ndal për të falënderuar të gjithë vendet që ndihmuan Shqipërinë me dozat e vaksinave, duke theksuar se kjo eksperiencë kërkon bashkëpunimin e të gjithëve.
“I detyrohem një falënderim Republikës së Turqisë që na dha dozat për të nisur vaksinimin. Po ashtu edhe Italisë, Greqisë, Letonisë, e të gjithë atyre që janë ofruar të na ndihmojnë. Pabarazia në qasjen për vaksina ka nxjerrë edhe njëherë e më shumë në pah përplasjen.
Duhet të qëndrojmë së bashku për të rezistuar ndaj nacionalizmave. Eksperienca e gjatë e OKB na ka mësuar se eksperienca kërkon bashkëpunimin e të gjithëve” – tha Rama që u ndal edhe te procesi i integrimit.
“Kjo Asamble e madhe nuk është dhe nuk do të jetë e plotë pa një nga shtet e rajonit tona, Republikën e Kosovës. Me keni dëgjuar më shumë sesa njëherë të bëj thirrje për njohjen e pavarësisë së Kosovës. Nuk është opsesion dhe as diçka thjesht sa për ta thënë për kauzën, është ftesë për të njohur realitetet e reja në zemër të Evropës, në Ballkanin Perëndimor ku një shtet i ri lindi me ndihmën e bashkësisë ndërkombëtare.
Kjo punë duhet të përfundohet dhe dua ta përsëris këtë thirrje. Realiteti na ka treguar se ne, kosovarëve, serbëve dhe gjithë ballkanasve, evropianëve dhe kujtdo që do ta shohë se një Kosovë e pavarur dhe sovrane është një realitet që vazhdon prej 13 vitesh dhe ka sjellë më shumë paqe dhe stabilitet.
Shqipëria mbështet si alternativë të vetme dialogun mes Kosovës dhe Serbisë që do të sjellë njohjen e ndërsjelltë mes dy shteteve. Çdo ditë pa një marrëveshje të tillë është një ditë e humbur, një ditë që i hiqet së ardhmes së përbashkët. E them me bindje absolute, vetëm maturia dhe vizioni do ta lejojë më në fund Serbinë të heqë barrën e së shkuarës”, tha Rama.
Deklaratat e kryeministrit Rama për Kosovën në Asamblenë e OKB-së vijnë vetëm dy ditë para vizitës zyrtare në Prishtinë, ku Rama i ftua nga kryeministri Albin Kurti.
