Kryeministri Edi Rama dha mbrëmjen e sotme një intervistë në Klan Kosova, licenca e të cilit është pezulluar nga Ministria e Industrisë, Ndërmarrësisë dhe Tregtisë. Vendimi erdhi pas dyshimeve për keqpërdorim të detyrës zyrtare, si dhe keqpërdorim të autorizimeve ekonomike.
Por Rama u shpreh i habitur me vendimin e Agjencisë për Regjistrimin e Bizneseve për t’ia pezulluar licencën e biznesit Klan Kosovës. Ai ka thënë se është e pabesueshme një lëvizje e tillë.
“As nuk e kam besuar se mund të jetë e vërtetë. Nuk besoj që është e vërtetë. Ju po shpifni!”, ka shtuar Rama duke shprehur habinë.
“Nuk ka mundësi që Qeveria e Kosovës ta mbyllë Klan Kosovën. Nuk është e mundur”, shtoi ai.
Ai ka shprehur besimin e tij se Klan Kosova do të vazhdojë së funksionuari.
“Nëse ju është pezulluar licenca e biznesit, duhet ta falënderoni se ua ka rritur audiencën. Kam shumë besim që do të bëjmë intervista përsëri”, është shprehur ai.
E ndërsa Kryeministri i Shqipërisë u shpreh i habitur me pezullimin e licencës për Klan Kosova, në qeverisjen e tij, u mbyll Agon Channel, një televizion që sot po i kushton Shqipërisë edhe një faturë financiare, pas vendimit të Gjykatës së Arbitrazhit.
Discussion about this post