Rama: Njerëzit s’janë të kënaqur me ne, por besojnë. Kujdes mos biem në kurth

Kryeministri Edi Rama, gjatë një takimi falenderues në Tiranë, u shpreh se ne nuk duhet të biem në kurthin që populli është i lumtur me ne.

“Jam i bindur që edhe në këtë sallë po të pyesim nëse jeni të kënaqur me ato që ndodhin në këtë vend, nëse jeni të kënaqur me punën e qeverisë, shumica do të thonë që nuk jemi të kënaqur. Por ne na kanë votuar sepse njerëzit besojnë se gjërat që ata presin të bëhen mund ti bëjmë vetëm ne”, tha Rama.

Ai theksoi se rezultati i 14 majit tregon se qytetarët kanë një pritshmëri shumë të madhe dhe kjo është shumë sfiduese për socialistët.

“Njerëzit nuk janë të kënaqur me ne, por besojnë te ne. Kjo pritshmëri kaq e madhe në mesin e mandatit të 3-të të qeverisë është inkurajuese, por njëherazi shumë e rrzikshme. Unë e di që ne nuk mund ta përmbushim plotësisht këtë pritshmëri kaq të madhe, pasi është e pamundur për të plotësuar nevojat e të gjithëve. Dhe kjo mund të marrë një tjetër drejtim, që uroj mos të jetë e gabuara”, tha Rama.