Kryeministri Edi Rama në një intervistë për “Corriere della Sera” ka folur për platformën Anti-Shpifje, i cili ka thënë se duhet një rregullim i mediave online.
Sipas Ramës është e mjaftueshme të shohësh se si kanë ndikuar vitet e fundit për të kuptuar se i kanë shërbyer më shumë regjimeve autokratike.
“Një rregullim është i nevojshëm, boll të shohësh se si kanë ndikuar këto vitet e fundit, nuk janë demokracitë që dalin të forta, por regjimet autokratike, imagjinoni se çfarë do të bënte sot propaganda naziste nëse do të kishte mediat sociale” – ka thënë Rama.
Kujtojmë se për këtë ligj është shprehur edhe Komisioni i Venecias i cili i ka kërkuar vitin e kaluar Qeverisë të rishikojë paketën “Anti-Shpifje”. Në opinionin e saj Venecia vlerësoi se paketa “Anti-Shpifje” nuk është gati për t’u adoptuar dhe karakterizohet nga vakum ligjor.
“Anti-Shpifja”, e kontestuar gjerë nga palët e interesit dhe institucione ndërkombëtare, u votua në parlament në dhjetor të 2019-ës me votat e mazhorancës qeverisëse. Siç duket Rama akoma nuk ka hequr dorë prej këtij projektligji.
Discussion about this post