Nga Fieri ku zhvilloi një takim me socialistët në Asamblenë e zgjeruar, Kryeministri Edi Rama ka lëshuar një paralajmërim ndaj kokave të krimit të organizuar.
Rama u shpreh se ata që nuk ia kanë mbathur ende jashtë vendit, do e kenë vendin në burg. Në këtë kuadër ai tha se tashmë ka nisur revanshi i shtetit ndaj krimit të organizuar dhe ata që ndodhen aktualisht pas hekurave, shërbejnë si “provë e gjallë” për fundin e epokës së të paprekshmëve.
“Të gjithë ata që i përkasin asaj bote dhe do të kenë kurajën të rrijnë në Shqipëri, se një pjesë ia kanë mbathur, do të përfundojnë aty ku kanë shkuar ata që janë provat e para të gjalla, se s’ka asnjë kompromis me krimin.
Këtë luftë do ta fitojë shteti, normalisht nuk ka shtet pa krim dhe krim të organizuar, por ama, një epokë e gjatë të fortësh me statuse speciale me botën e krimit të organizuar do të mbyllet. Nëse krimit të organizuar dhe krimi i organizuar si bota e nëndheshme, ata do të kenë bishtat e tyre, por jo më mbi dhe, nën dhe! Mbitoka e Shqipërisë do të jetë e qytetarëve shqiptarë, pastaj lufta me krimin e organizuar do të bëhet në nëntokë”, tha Rama.
Discussion about this post