Kryeministri Edi Rama në një editorial për Politico.eu, ka deklaruar se në kuadër të Ballkanit të Hapur, lëvizja e lirë e mallrave mes Shqipërisë, Maqedonisë së Veriut dhe Serbisë mund të nisë në janar të vitit 2022, ndërsa kufijtë për lëvizjen e njerëzve një vit më vonë, në janar të vitit 2023.
““Shpresojmë të fillojmë lëvizjen e lirë të mallrave në janar 2022 dhe të hapim kufijtë tanë deri në janar 2023. Dhe është e vetëkuptueshme që “Open Balkan” është i hapur për të gjitha vendet e Ballkanit Perëndimor sa herë që ata vendosin të bashkohen”, shkruan Rama.
Ndër të tjera, Rama ka bërë të qartë se synimi i Shqipërisë është integrimi në BE, pavarësisht se nuk lë pas kritikat ndaj Bashkimi Europian se po tregohet e paaftë që të përmbushë premtimet e saj duke humbur fytyrën me mbrojtësit e saj më të fortë.
Rama thekson se Bashkimi Europian po humb qëllimin për të cilin është krijuar dhe e cilëson të çuditshme bllokimin për shkak të vetos bullgare, sikurse kritikon edhe faktin se Kosovës ende nuk i janë liberalizuar vizat ndonëse ka përmbushur kushtet. Kryeministri i sugjeron BE 4 hapa konkrete për Ballkanin Perëndimor.
“BE mund ta mbështesë rajonin ekonomikisht nëpërmjet Planit të saj Ekonomik dhe Investimeve për Ballkanin Perëndimor , për të cilin tashmë janë identifikuar disa projekte. BE gjithashtu mund të na ndihmojë të ruajmë mendjet tona më të ndritura me programe të përbashkëta të arsimit të lartë dhe integrim në sistemin arsimor të BE. Vendet e Ballkanit Perëndimor mund të përfshihen gjithashtu në planet emergjente të BE-së, pasi së bashku po përballemi me një krizë potencialisht shkatërruese energjetike që mund të zhbëjë progresin e viteve në rajon. Ne duhet të sigurojmë që qytetarët tanë të mos mbeten të pambrojtur”, shkruan kryeministri.
Gjithashtu Rama kërkon marrjen e hapave praktike sa i takon lëvizjes së lirë të mallrave e shërbimeve që është në qendër të nismës “Ballkani i Hapur”.
