Në një intervistë për shërbimin afgan të Zërit të Amerikës, ai tha se refugjatët afganë mund të qëndrojnë në Shqipëri për aq kohë sa ata dëshirojnë. Kryeministri Edi Rama tha se Shqipëria si vend anëtar i NATO-nuk duhet të merrte pjesën e saj të përgjegjësisë për të mbrojtur shtetasit afganë që ndihen të rrezikuar nga regjimi taleban.
“Këtu janë në shtëpinë e tyre. Ata duhet të ndihen si në shtëpi këtu, dhe nëse duan të qëndrojnë, ata janë të mirëpritur. Ne kurrë nuk do t’u themi atyre të largohen nga vendi sepse nuk i plotësojnë kriteret. Ne kurrë nuk do t’u themi atyre se duhet të aplikojnë për një vizë në Shqipëri. Ne kemi vuajtur shumë nga regjimet e vizave dhe nuk do të jemi tani një vend i regjimit të vizave për ta, kështu që ata janë më se të mirëpritur të qëndrojnë” – është shprehur Rama.
Sipas tij, shtetasit afganë që ndodhen në Shqipëri do të marrin kujdes shëndetësor falas, ndërsa po hartohet dhe një plan për të krijuar një rrjet mësuesish të cilët do të jenë në gjendje të japin mësim për fëmijët e shtetasve afganë që po strehohen në Shqipëri.
Rama gjithashtu tha se qeveria që ai drejton nuk do të njohë qeverinë e re të talebanëve. Shqipëria ishte ndër vendet e para që u ofrua të presë qytetarët afganë që u detyruan të linin vendin e tyre për shkak të kërcënimit nga talebanët. Autoritetet shqiptare u shprehën të gatshëm të strehonin deri në 4 mijë persona. Aktualisht, deri më tani, janë mbi 650 shtetas afganë që kanë mbërritur në Shqipëri.
