Në një intervistë për gazetën franceze “Liberation.gr”, kryeministri Edi Rama ka reaguar lidhur me deklaratën e presidentit Manuel Macron për strehimin e afganëve.
Rama ka përgënjeshtruar deklaratën se Shqipëria dhe vendet e tjera kanë pranuar që të marrin afganët pasi po ndihmohen financiarisht për të përballuar faturën e strehimit të tyre.
Rama është përgjigjur i prerë duke thënë se vendi ynë nuk paguhet e se një pjesë e afganëve që kanë mbërritur kanë punuar në vendin e tyre për organizata jo qeveritare dhe kompani private dhe se janë ato që mbulojnë shpenzimet e tyre por pa i dhënë asnjë cent shtetit shqiptar.
Nga ana tjetër, Rama pohoi në intervistë se SHBA-të i kanë propozuar Tiranës financim për ngritjen e kampeve të refugjatëve, por se kjo gjë nuk është pranuar nga qeveria Shqiptare, “sepse kampet janë dehumanizuese dhe krijojnë probleme me popullsinë”.
Kryeministri ka pranuar gjithashtu se Shqipëria po përpunon një plan për integrimin e tyre në shoqëri duke filluar që me fëmijët. Ai ka pranuar se jo të gjithëve do tu jepet viza për të shkuar në SHBA dhe disa prej tyre do të mbeten gjithmonë në vend.
“Disa prej tyre janë gazetarë dhe teknikë dhe po shikojmë mundësinë ti integrojmë në sistemin tonë mediatik”, tha ndër të tjera Rama.
Ai gjithashtu shtoi se vendi ynë do të presë tre mijë afganë, një mijë më pak nga sa u deklarua në fillim. Aktualisht në vendin tonë janë strehuar rreth 700 afganë të cilët janë akomoduar në strukturat hoteliere në Durrës e Shëngjin, ndërsa një pjesë e tyre në “Qytet Studenti”.
