Ashtu sikurse ishte paralajmëruar, ministri i Jashtëm i Arabisë Saudite, Faisal Bin Farhan Al-Saud ka mbërritur në Tiranë për një vizite zyrtare. Kryeministri Edi Rama në një deklaratë për mediat, në krah të Al-Saud, tha se kjo vizitë ka në qendër të saj thellimin e bashkëpunimit mes vendeve.
“Ka qënë ai që e ka mbajtur gjallë bashkëpunimin dhe komunikimin në kushtet kur për shkak të pandemisë kontaktet u vështirësuan shumë. Kjo vizitë është një shenjë e drejtpërdrejtë që gatishmëria dhe dëshira e miqve tanë sauditë për të thelluar bashkëpunimin me Shqipërinë është e madhe, ndërkohë që bashkë ne ndajmë dhe kënaqësi meqë numri i vizitorëve nga Arabia Saudite ka qenë i madh”.
Ndër të tjera, Rama tha se Shqipëria dëshiron të jetë pjesë e nismës së Arabisë Saudite të mbjelljes së 50 miliardë pemëve në të gjithë lindjen e mesme.
“Ne jemi shpresëplotë, që kjo vizitë është hapja e një kapitulli vizitash. Sot unë ia ripërsërita ministrit për të pritur këtu princin e kurorës, kjo lidhet me lëvizjet e princit në kushtet kur vigjilenca ndaj Covid është e lartë, e falenderova për ndihmën e vazhdueshme që Arabia Saudite i ka dhënë Shqipërisë, sidomos kur kemi pasur më shumë nevojë. Besoj se tanimë jemi në kushtet kur mund të shohim me optimizëm, mundësitë e investimeve. Ramë dakord për të mbledhur sa më parë komitetin e përbashkët, për të adresuar prioritetet në thellim të bashkëpunimit ekonomik. Ndamë ide për nismën madhështore të Arabisë Saudite për rritjen e përmasës së gjelbrës të të gjithë lindjes së mesme, përmes projektit të mbjelljes së 50 miliardë pemëve. Ne do të ishim shumë të lumtur të ishim pjesë e kësaj nisme. E fundit dua ta ritheksoj që Arabia Saudite e ka njohur Kosovën dhe ka qenë një nga mbështetëset e rëndësishme, patjetër që zëri i Arabisë është me shumë peshë dhe ne do të vazhdojmë të bashkëpunojmë me ministrin”, tha Rama.
