Kanë mbetur edhe disa orë për zyrtarizimin e qeverisë “Rama 3” dhe brenda PS vijojnë të qarkullojnë emra të rinj të kandidatëve për ministra.
Ditët e fundit është përfolur për shumë emra të rinjsh dhe pjesa më e madhe do të jenë femra. Vajza e deputetit të ndjerë Bashkim Fino aktualisht zëvendës ministre e Punëve të Jashtme, Megi Fino, mund të jetë një prej prurjeve të reja nga Edi Rama në skuadrën e tij qeverisëse.
Gjithashtu si prurje e re shihet edhe Adea Meidani, vajza e ish presidentit socialist, Rexhep Meidani e shkolluar në Paris me një eksperiencë pune në Londër e specializuar për taksat ndërkombëtare, shihet si një kandidate potenciale nga Edi Rama për t’i besuar drejtimin e Ministrisë së Ekonomisë, gjithnjë nëse do t’i shkojë skenarit të ndarjes të Ministrisë së Financave nga Ekonomia.
Ekziston mundësia e ristrukturimit të Ministrisë së Punëve të Jashtme, duke e kaluar Integrimin si ministri më vete. Zef Mazi, aktualisht krye-negociator i Shqipërisë me Bashkimin Europian, shihet si kandidat më potencial për ta drejtuar.
E enjtja do t’i japë fund edhe dilemës nëse Olta Xhaçka do të vijojë të drejtojë diplomacinë shqiptare, apo do të jetë e para grua, të cilës i besohet Ministria e Punëve të Brendshme. Sikurse do të mësohet se Lindita Nikolla mund të jetë në krye të parlamentit. Një emër surprizë është edhe Anisa Ruseti, e cila mund të shfaqet në drejtimin e çështjeve sociale.
Socialistët nuk janë të sigurte për emrat që ka përzgjedhur Edi Rama në drejtimin e Ministrisë së Drejtësisë, të Brendshme apo të Mbrojtjes. Por një gjë është e sigurt, kushdo të jenë emrat e përzgjedhur për këto tre poste nga Rama, ato kanë kaluar për një ‘OK’ nga Ambasada Amerikane, citon Top Channal.
