Kryeministri Edi Rama ka njoftuar nga mbledhja e Asamblesë së PS-së ndryshimet në kabinetin qeveritar.
Olta Xhaçka dhe Frida Krifca janë dy emrat që kanë lënë përfundimisht pozicionet e tyre në Qeveri, ndërsa janë zëvendësuar nga Igli Hasani dhe Anila Denaj, përkatësisht Ministër i Jashtëm dhe Ministër i Bujqësisë.
Igli Hasani ka qenë Koordinator Ekonomiko-Ambiental i OSBE-së. Ky pozicion është më i larti i mbajtur ndonjëherë nga një shqiptar në Organizatën për Sigurinë dhe Bashkëpunimin në Evropë. Më herët ka qenë ambasador i Republikës së Shqipërisë në Vjenë. Igli Hasani drejtoi misionin e Shqipërisë në OSBE, nga janari i vitit 2018 deri më nëntor të 2021, kohë gjatë së cilës Shqipëria pati edhe presidencën e rradhës së OSBE-së.
Gjithashtu Evis Kushi është larguar nga Qeveria, ndërsa në postin e ministres së Arsimit dhe Sportit është emëruar Ogerta Manastirliu. Kjo e fundit zëvendësohet në pozicionin e ministres së Shëndetësisë nga Albana Koçiu.
Një tjetër emër i larguar nga Qeveria është Edona Bilali, që mbante funksionin e ministres për Sipërmarrjen, pozicion që i është besuar në kabinetin e ri, Delina Ibrahimajt.
Ervin Mete do të marrë postin e ministrit të Financave, duke zëvendësuar Delina Ibrahimajn, e cila mbetet pjesë e Qeverisë, por në pozicionin e ministres së Shtetit për Sipërmarrjen.
Posti i ri në kabinetin Rama është ai i ministrit për Pushtetin Vendor, pozicion që i është besuar Arbian Maznikut, zv.kryetarit të Bashkisë së Tiranës.
Me ndryshimet e prezantuara, Rama ka vendosur të rikthejë në Qeveri Anila Denajn, e cila ka mbajtur më parë postin e ministres së Financave
MINISTRAT E RINJ
Ministër i Financave dhe Ekonomisë, Ervin Mete
Ministër për Evropën dhe Punët e Jashtme, Igli Hasani
Ministre e Sportit dhe Arsimit, Ogerta Manastirliu
Ministre e Bujqësisë dhe Zhvillimit Rural, Anila Denaj
Ministrisë i Shëndetësisë, Albana Kociu
Ministri Shteti për Sipërmarrjen dhe Biznesin, Delina Ibrahimaj
Ministër Shteti për Pushtetin Vendor, Arbjan Mazniku
Discussion about this post