Kryeministri Edi Rama gjatë mbledhjes së zhvilluar sot me kryebashkiakët e vendit, ka bërë mjaft kritika për këta të fundit. Në fjalën e tij kreu i qeverisë solli në vëmendje rastin e prishjes së karburantit në Lushnjë, për të cilin tha se leje të tilla nuk mund të jepeshin nga bashkitë, duke paralajmëruar se të gjithë personat që kanë firmosur do të shkojnë në prokurori.
“Nuk e di a e patë karburantin e prishur dje. Për atë do të shkojnë në prokurori të gjithë ata që kanë firmosur në bashkinë e Lushnjës. Sepse nuk kanë asnjë të drejtë të japin firma për rrugë kombëtare. Pa diskutuar më pas shkeljet që janë bërë” u shpreh Rama.
Por, kjo deklaratë është pjesë e lojës dhe absurditetit të qeverisë, pasi shemb një pikë karburanti në Lushnje dhe këtej i jep lejen një kompanie tjetër, e cila gjithashtu ka ndërtuar më parë pika shitje në shkelje të ligjit.
Megjithatë kjo kompani ndryshe nga “Gega-Oil” në Lushnje ka fituar lejen e sot nga KKT. “Leje Ndërtimi për objektin: “Stacion i shitjes së karburanteve Bolv-Oil, me vendndodhje në Bashkinë Tiranë”, me zhvillues shoqërinë “Bolv-Oil” sh.a. Leje Ndërtimi për objektin: “Kompleks rezidencial studentor dhe shërbime ndihmëse”, me vendndodhje në Bashkinë Tiranë, me zhvillues shoqërinë “Bolv-Oil” sh.a”, thuhet në vendimin e KKT.
Pra, sikur duket kompanitë në vend janë “ca të nënës e ca të njerkës” për kryeministrin Rama.
