Në familjen e kryeministrit Rama kanë qenë të bindur se Kamala Harris do të fitonte ndaj Donald Trump. Këtë e tregon edhe promovimi në Tiranë i autobiografisë së Kamala Harris, ku Linda Rama, bashkëshortja e kryeministrit Edi Rama, është autore e parathënies. Libri titullohet “Të vërtetat që mbartim”, një autobiografi e ish-kandidates për presidente të SHBA-ve, Kamala Harris, e cila ka qenë edhe prokurore.
Linda Rama shprehet se parathënia e librit është bazuar në dy momente, “liritë dhe të drejtat e njeriut” dhe “profili i prokurorit”. Rama tregon se karriera e Kamala Harris kishte rritje graduale qoftë si prokurore por edhe si politikane.
“Libri është shkruar kur Kamala ishte zv.presidente dhe ishte një nga dy kandidatët që kërkonte të hynte në zyrën ovale që në fakt është zyra siç e kam thënë edhe në parathënie është zyra më e rëndësishme e botës. Karriera e Kamalës ishte kaq graduale, sa herë-herë kisha nota mosbesimi, a është një guidë se si duhet të jetë një prokuror apo si duhet të jetë një politikane. Asnjëherë nuk më erdhi Kamala si thjesht një grua që në fakt rrënjët e saj biologjike dhe sociale i kishte te grupet vulnerabël të shoqërisë. Ajo nuk kishte asnjë lloj vulnerabiliteti në libër. Ndërsa dëgjoja fushatën, komentet që bëheshin në favor të njërit apo kandidatit tjetër, mua Kamala më vinte me fuqinë e saj nga libri i shkruar në vitin 2018”, tha Linda Rama.
Ajo u ndal dhe të humbja e Harris, teksa tha se kandidatja demokrate nuk do të hyjë në Zyrën Ovale duke shtuar se gjithçka ndodhi siç e donte populli amerikan. Kjo është e bukura e demokracive, tha Linda Rama, duke sjellë në vëmendje se është populli ai që vendos.
Më tej, Linda Rama shtroi edhe pyetjen se çfarë i mungoi kandidates demokrate për të qenë Presidente e SHBA në zgjedhjet e 5 nëntorit, teksa një model fitues deri në momentin kur ishte senatore nuk u kthye i tillë si numri një i Shtëpisë së Bardhë.
“Kamala Harris në janarin e ardhshëm nuk do të hyjë në zyrën ovale por unë mendoj që kjo pikërisht i jep librit të ketë një stacion tjetër imagjinar. Pse një model fitues deri në momentin kur Kamala Harris ishte senatore e SHBA nuk u kthye në një model fitues si presidente e SHBA? Unë jam shumë kurioze për të ditur të vërtetat e Kamala Harris si zv/presidente e SHBA të cilat nuk janë në këtë libër dhe si kandidate për presidente e SHBA. Fuqia me të cilën Kamala sjell jetën e saj në karrierë deri në vitin 2018 mendoj që do të ketë fuqinë që të transmetojë ashtu siç duhet të vërtetat derisa ajo shërbente si zv/presidente e SHBA dhe konkurronte për presidente. Uroj shumë që këto të vërteta ne të na ofrohen dhe ne të kemi mundësi të mblidhemi përsëri dhe të diskutojmë. Megjithatë, do të doja ta mbyllja fjalën time me një pyetje që e kam vazhdimisht në mendje: Çfarë i mungoi profilit të Kamala Harris për të mos qenë Presidente e SHBA? Dhe çfarë nga profili i Kamala Harris ka Presidenti i zgjedhur që do të hyjë në zyrën ovale në janar të vitit të ardhshëm? Ç’pjesë nga profili i Kamala Harris ka për të ushtruar përgjatë detyrës së tij si President i SHBA?”, përfundoi Linda Rama.
Duket se Edi Rama i ka qëndruar mendimit të shprehur në vitin 2016 për Trump. “Donald Trump është kërcënim për Amerikën dhe pa dyshim është kërcënim për marrëdhëniet shqiptaro amerikane. Do të ishte një President që do t’i bënte dëme të mëdha Amerikës dhe do të ishte kërcënim real për marrëdhëniet shqiptaro-amerikane”, deklaronte asokohe Rama.
gijotina.com/
Discussion about this post