Rama: Prokurorë e gjyqtarë pa atdhe e pa fe, individë të padenjë

Kryeministri Edi Rama ka ashpërsuar tonet ndaj prokurorëve dhe gjyqtarëve, që sipas tij, nuk zbatojnë ligjin për rastet e zjarrvëniese të qëllimshme, edhe pse policia ka arrestuar autorët e tyre. Nuk është hera e parë që prokurorët dhe gjyqtarët vihen nën akuza dhe presion nga Kryeministri.

Këtë rradhë Rama ka targetuar prokurorët e gjyqtarët që sipas tij nuk dënojnë pirromanët, ndërkohë që ligji parashikon një burgim deri në 15 vite burg.

“Me ndryshimet që i kemi bërë vitet e fundit Kodit Penal, zjarrvënia e pyjeve dënohet deri në 15 vjet burg dhe në tasin e kësaj fare të keqe prokurorësh pa atdhe, ka deri edhe disa syresh që gjatë viteve të shkuara kanë shpallur deri mosfillimin fare të çështjes penale për zjarrëvënësit.

U bëj apel organeve të inspektimit të drejtësisë dhe mbikqyrjes së veprimtarisë së prokurorëve e gjykatësve, që të mos bëjnë sehir karshi këtyre individëve të padenjë për t’i shërbyer ligjit të Republikës së Shqipërisë.

U bëj gjithashtu apel prokurorëve dhe gjykatësve që kanë në duar rastet e lartpërmendura, që të zbatojnë rreptësisht ligjin dhe t’i dalin për Zot kësaj pasurie të vënë në breza, e cila u takon brezave të ardhshëm, po edhe krejt njerëzimi”, shkruan Rama në një postim në rrjetet sociale.

Në vijim ai thekson se Policia e Shtetit po bën një punë të admirueshme për zbulimin dhe kapjen e autorëve të krimit të tmerrshëm të zjarrvënies në pyje, ullishta e zona të gjelbërta. Sipas tij, në 79 raste zjarrëvënieje gjatë këtij viti, janë zbardhur 55, me 62 autorë të proceduar penalisht.

“20 zjarrvënës janë në arrest me burg, ndërsa të tjerët ndiqen në gjendje të lirë, por ende mungon ndëshkueshmëria e plotë, si pasojë e qasjes skandaloze dhe paturpësisht të papërgjegjshme të disa prokurorëve e gjykatësve nëpër rrethe, të cilët mesa duket s’ka atdhe, s’ka fe, s’ka din e as iman, që i frenon në krimin e tyre të indiferencës antiligjore ndaj një krimi si zjarrvënia mbi një pasuri kaq të vyer, që është e të gjithë fëmijëve të Shqipërisë, po edhe e mbarë njerëzimit”, shkruan Rama.