Kryeministri Edi Rama në konferencën me gazetarët është ndalur tek vendimi i Gjykatës së Strasburgut për 21 Janarin. Sipas tij ky është një krim shtetëror, që sado të vonoje e vërteta do të zbardhet.
Rama tha se Prokuroria e Tiranës është tallur me këtë çështje, ndërsa orientoi drejtësinë e re që të reagojë sa më parë.
“Ndërkohë që prokuroria e Tiranës është tallur me përbuzje me Kushtetutën, ligjin dhe natyrisht me dhimbjen dhe të drejtën e familjarëve të viktimave në radhë të parë por dhe gjithë shoqërisë për të njohur deri në fund të vërtetën dhe e ka trajtuar si një leckë, një provë të re të dlë para disa muajsh, është koha që drejtësia e re të reagojë pasi në ndërkohë, qysh se ky krim ka marrë rrugët e prokurorive dhe gjykatave të vendit ka ndryshuar struktura e sistemit të drejtësisë dhe personalitetet apo profilet e zyrtarëve të lartë hetohen nga një tjetër strukturë.
Leximi i vendimit të gjykatës është si të lexosh një rrëfim të stërpërsëritur prej nesh ndër vite. Vendosja e gishtit drejtpërdrejtë te autoritetet ekzekutive të kohës është e shkruar e zeza mbi të bardhë. Jo vetëm për krimin e vrasjes që ka mbëtur pa autor, sepse vrasja nuk ka nisur nga tërheqja e këmbës së armës, por nga urdhri që ka ardhur nga maja, por nga ana tjetër, gjykata nënvizon vë gishtin edhe te krimi i pengimit të drejtësisë. Është e qartë në vendim se autoritetet më të larta të vendit kanë penguar në mënyrën më brutale (kriminale) drejtësinë që të reagojë dhe të veprojë në kohë reale për të nisur zbardhjen e këtij krimi.
Unë e kam bindje edhe sot, që nuk ka asnjë forcë që mund ta pengojë zbardhjen përfundimtare të krimit shtetëror të 21 Janarit. Por mund të vijojë të vonohet. Jam këtu duke i shprehur këto konsiderata sepse është e rëndësishme për moralin e sistemit të drejtësisë, institucioneve që të mos vijojë kalvari i familjeve të viktimave të mos vijojë të rrijë pezull e gjithë shoqëria për shkak të këtij krimi dhe mos vijojë tërheqja e moskëputja e vonesës së qëllimshme dhe cinike përballë domosdoshmërisë së drejtisësi mb 21 Janarin.
Përballë 21 janarit dhe krimit shtetëror të 21 Janarit të gjitha të tjerat kanë rëndësinë e tyre, por janë shumë më pak në mundësinë për të peshuar në vendosjen e plotë të të gjithë themelit të ri të drejtësisë që sapo ka nisur të ndërtohet. Nëse 21 Janari mbetet në ajër edhe themeli i ri i drejtësisë, nuk e mban dot të gjithë peshën e jashtëzakonshme të misionit që ka drejtësia në një vend demokratik, ku askush nuk është mbi ligjin dhe ku askush nuk mund ta ushtrojë pushtetin e përkohshëm për të marrë jetë njerëzish të pafajshëm”, u shpreh Rama.
Discussion about this post