Kryeministri Edi Rama po mban një takim me një grup pensionistësh ku më shumë se sa po iu prezanton të ashtuquajturën “Paketën e Rezistencës Sociale”, është përpjekur t’iu tregojë punën e “jashtëzakonshme” të qeverisë për menaxhimin e krizës me çmimet.
Madje Rama është mburrur para të moshuarve duke iu thënë se ka marrë kritika nga kolegët e tij për menaxhimin e krizës energjetike, pasi sipas tij ishte qeveria që mbajti barrën mbi supe.
“Unë doja të nënvizoja faktin se lufta ka ndikuar në të gjitha çmimet, ndërkohë që kriza më e madhe hëpërhë, është një krizë që ka nisur përpara luftës. Ka qenë pjesë e skenarit të luftës nga ana e Rusisë, për të turbulluar ujërat e furnizimit me energjinë. Kjo afekton drejtpërdrejtë ekonominë tonë, këtë sasi energjie që ne duhet të dalim në treg për ta blerë, pasi më shumë ka diell sesa re, dhe më shumë re sesa shi, në 3 vitet e fundit. Ne edhe në kohën kur ka reshje të mjaftueshme, duhet të dalim në treg të lirë. Si mundemi ne që këtë krizë ta transferojmë te faturat tuaja, te faturat e pensionistëve, që do ta kishin jashtëzakonisht të rëndë këtë ndikim. Sot faktikisht kur vjen fatura në shtëpi, ajo vjen njësoj siç ishte. Këtë që po bëjmë ne nuk po e bën asnjë qeveri në rajon, pasi të gjitha kanë rritur faturën e energjisë, direkt, pasi kolegët e mi më thonë që kjo që po bëjmë ne është një çmenduri financiare. Por është dhe një çmenduri më e madhe sipas nesh që këtë stres tua shtojmë shqiptarëve, pas tërmetit dhe Covid”, tha Rama.
Në këtë paketë, Rama është shprehur se do shpërndahen 3.3 miliardë lekë për indeksimin e pensioneve në masë 3.3% për 673,813 pensionistë. Konkretisht 3 mijë lekë për 3 muaj, për: pensionistët që marrin më pak sesa gjysma e pagës minimale; pensionistët që trajtohen me pension invaliditeti; pensionistët që jetojnë vetëm; Personat me aftësi të kufizuar, paraplegjikë, tetraplegjikë apo të verbër; si dhe të gjitha familjet në skemë ekonomike.
Por ditën e djeshme, Open Data e nxori zbuluar duke thënë se masat e ndërmarra si rezistencë sociale përgjithësisht nuk janë masa të reja por vijim i politikave të planifikuara që në fundvitin e kaluar me përgatitjen dhe miratimin e Planit të Buxhetit 2022 dhe i konsideroi si koste shtesë për buxhetin e shtetit.
Discussion about this post