Kryeministri Rama ka folur mbrëmjen sotme për përplasjet mes socialistëve të Shkodrës gjatë një mbledhje me dyer të mbyllura që u mbajt pak ditë më parë.
Në këtë mbledhje socialistët thuhet se janë ankuar për punësimet në Shkodër, pasi gjysmën e tyre i kërkon aleati Tom Doshi.
Rama i mohoi këto zëra duke thënë se janë lajme portalesh dhe se Tom Doshin e ka përjashtuar nga partia më herët, duke shmangur kështu cdo pyetje për këtë çështje.
“Tom Doshin unë e kam përjashtuar nga partia.
Këto janë përralla provincash, unë nuk merrem me këto. Ta dish ti, është e prerë dhe kush nuk e ka kuptuar do vazhdojmë ta bindim ta kuptojë nga të gjithë deputetët e PS, partia jonë nuk ka për të lidhur më drejtorin me partinë dhe partinë me drejtorin. Bëhet mbledhje partie në Shkodër, dalin ca fjalë, shkojnë e hidhen në portale dhe unë Kryeministri merret me thashetheme. Unë Tom Doshin e kam përjashtuar nga PS. Ai votat atje i merr vetë. Me këtë sistem kush merr votat shkon në parlament. Unë mendoj se SHBA-të marrin vendimet e tyre, ne marrim tonat”- u shpreh Edi Rama.
Rikujtojmë, që nuk është hera e parë që socialistët e Shkodrës i ankohen kryeministrit Edi Rama pë punësimet që po bën Tom Doshi në qytet.
