Kryeministri Edi Rama ka reaguar pas vrasjes tragjike të gjyqtarit të Apelit, Astrit Kalaja, ngjarje që tronditi vendin dhe hodhi dritë mbi problemet e sigurisë brenda institucioneve të drejtësisë.
Duke shprehur ngushëllimet vëllazërore për familjen e gjyqtarit Kalaja, Rama e cilësoi aktin si një agresion kriminal që kërkon përgjigjen më ekstreme ligjore ndaj autorit.
“Ngushëllime vëllazërore familjes së gjykatësit të ndjerë Astrit Kalaja. U prehtë në paqe. Agresioni kriminal mbi gjykatësin kërkon padyshim përgjigjen më ekstreme ligjore ndaj agresorit,” – u shpreh Rama në reagimin e tij publik.
Kryeministri kërkoi reflektim të menjëhershëm për sistemin e sigurisë së brendshme të gjykatave, duke vënë në dukje se aktualisht ky sistem funksionon përmes policive private, çka sipas tij është e papranueshme.
“Kjo tragjedi kërkon një reflektim për sistemin e sigurisë së brendshme të gjykatave, i cili përveçse sipas ligjit kërkon disa pajisje teknologjike, nuk mund të mbetet një çështje zgjedhjeje mes policish private në emër të pavarësisë së gjyqësorit!” – theksoi Rama.
Ai bëri thirrje për ashpërsim domethënës të Kodit Penal lidhur me armëmbajtjen pa leje, si dhe për eliminimin e çdo hapësire ligjore që lehtëson dënimet për këtë vepër.
“Kjo ngjarje tragjike është argumenti më i pakundërshtueshëm për të mbështetur ashpërsimin e dënimit për armëmbajtjen pa leje dhe për të ngushtuar maksimalisht hapësirën për lojëra me afatet në dëm të mbrojtjes nga armët e paligjshme,” – tha Kryeministri.
Në përfundim, Rama bëri apel që ky moment tronditës të shërbejë si nxitje për një reflektim serioz, jo vetëm në politikë, por edhe në sistemin gjyqësor, mbi lehtësinë me të cilën trajtohet shpesh armëmbajtja pa leje në vendimet e gjykatave.
Discussion about this post