Kryeministri Edi Ramën refuzon interpelancën urgjente të kërkuar nga opozita pas investigimit të televizionit italian “Rai 3”, lidhur me marrëveshjen për strehimin e refugjatëve në vendin tonë.
Përmes një postimi të gjatë në rrjetin social “X”, Rama e akuzon opozitën se të gjitha ato që ai i quan shpifje të cilat u publikuan nga “Rai 3”, janë përgatitur në Tiranë nga opozita shqiptare dhe i janë servirur medias italiane.
Rama thotë se do të vazhdojë ta mbrojë “dinjitetin e Shqipërisë” dhe se për të, prioritet tashmë është që “akuzat dhe përbaljta” e bërë nga “Rai 3” të hidhen poshtë përpara audiencës italiane.
Çfarë t’u thuash këtyre që i gatuajnë shpifjet në shtëpi të tyre, pastaj i hedhin nga dritarja si akuza, pastaj u fryjnë si era plehrave që shpërndaheshin larteposhtë rrugë më rrugë kur këta, mos o Zot, qeverisnin vendin, pastaj vënë kujën pse u ndotën rrugët e bëra pis prej… pic.twitter.com/mzFKRpJrjd
— Edi Rama (@ediramaal) April 26, 2024
Pas kësaj, shton Rama, do të sqarojë për opinionin publik shqiptar se çfarë fshihet prapa këtyre akuzave.
Pas deklaratës së kryeqeveritarit ka reaguar Gazment Bardhi, kreu i grupit parlamentar demokrat, i cili e quan Ramën “qesharak dhe frikacak”.
Ai kujton dhe refuzimin që kryeministri i bëri kërkesën për interpelancë nga opozita lidhur me akuzat se i vëllai, Olsi Rama, është i përfshirë në “dosjen e kokainës së Xibrakës.
“Ankohet se nuk i është dhënë mundësia të përfshirëve në investigimin e “Rai 3” që të japin sqarimet e tyre, por ndërkohë i fshihet Kuvendit. Shqiptarët kanë një muaj që presin sqarimet, por Edi Rama fshihet, Olsi fshihet, kushdo i përfshirë fshihet”, shkruan Bardhi në një postim në “FB”.
Reagimin e mbyll me një apel për SPAK që të “vihet përpara përgjegjësisë cilido, qoftë ky edhe vëllai i Kryeministrit”.
Discussion about this post