Kryeministri Edi Rama, njëherzi kryetar i PS-së, ka kërkuar sot dorëheqjen e të gjithë sekretarëve socialist, ndërsa i vetmi që do të mbajë një funksion në parti deri në muajin shtator është Blendi Klosi.
Ky i fundit zëvendësoi Damian Gjiknurin në pozicionin e Sekretarit të Përgjithshëm. Por edhe Klosi do të ketë një mandate të kufizuar, pasi në shtator, sikundër paralajmëroi Edi Rama do të ketë një mbledhje të Kongresit dhe të Asamblesë së PS-së.
Pikërisht në këto dy mbledhje do të ketë edhe një ripërtëritje të strukturës drejtuese të Partisë Socialiste dhe natyrisht edhe zgjedhjen e sekretarëve të rinj.
Sekretarët e dorëhequr apo të shkarkuar nga Edi Rama ishin zgjedhur dy vite më parë. Nuk dihet nëse ata do të kenë të drejtën të rikandidojnë sërisht për postet që kanë sot në PS apo jo, por duket se Rama do të bëjë një tjetër organizim dhe natyrisht me të tjerë emra në rradhët e socialistëve.
Në mbledhjen e sotme të Asamblesë, gjithashtu u vendos që Grupin Parlamentar të kësaj partie do t’a drejtojë Bledi Çuçi, ish-ministër i Brendshëm, i cili duket se ka këmbyer vendet me Taulant Ballën, i cili hoqi dorë nga drejtimi i Grupit, për të zëvendësuar Çuçin në Qeveri.
Megjithëse më herët ishte paralajmëruar se në Asamble mund të kishte një vendimmarrje mbi ndryshimet në Qeveri, kjo nuk ndodhi. Ndoshta në dy ditët e ardhshme, kur Edi Rama pritet të bëjë edhe mbledhjen dy ditore informale me ministrat, e cila do të mbahet në Tepelenë, mund të ketë sinjale për ndryshime në Qeveri, edhe pse përgjatë muajit gusht, Kuvendi është i shpërndarë për shkak të pushimeve, dhe vështirë se Kryeministri të ndërmarrë hapa të tillë.
Sekretari I PS-së që u shkri nga Rama
Sekretar i Përgjithshëm Damian Gjiknuri
Sekretar Organizativ, Blendi Klosi
Sekretar Dixhital, Etjen Xhafaj
Sekretar i Burimeve Njerëzore, Anila Denaj
Sekretare e Gruas, Etilda Gjonaj
Sekretare e Marrëdhënieve me Jashtë, Romina Kuko
Sekretare e Rinisë, Bojkena Basha.
Discussion about this post