Pasi kryeministri Rama paralajmëroi një krize energjitike që do të përfshijë vendin shumë shpejt, kryedemokrati Lulzim Basha ka reaguar përmes një deklarate për shtyp.
Nga selia blu, Basha tha se shqiptarët kanë tetë vite që përballen me çmimet më të larta në rajon të energjisë dhe karburanteve, duke kundërshtuar kryeministrin Rama kur tha se kjo vjen si pasojë e faktorëve gjeopolitikë.
Sipas liderit të opozitës, gjatë pandemisë dhe tërmetit qeveria i braktisi qytetarët, ku fondet e rindërtimit u përdorën për të fuqizuar ortakët Ramës.
“Ata e kanë parë se si në momentet më të vështira të këtyre viteve, kjo qeveri dhe ky kryeministër i ka braktisur. Kështu ndodhi me tërmetin, kështu ndodhi me pandeminë. Shqiptarët e kanë parë se si fondet e rindërtimit u përdorën për të majmur ortakët e Edi Ramës, dhe po këto fonde të jepeshin jo për njerëzit në nevojë, por për të marrë në këmbim votën e tyre. Shqiptarët e kanë vuajtur në lëkurën e tyre braktisjen gjatë pandemisë, kur babëzia e kësaj pakice të korruptuar dha ndihmën më të ulët ekonomike në Europë, duke shkaktuar rritjen më të madhe të jetëve të humbura në kontinent, varfëri dhe papunësi”.
Lideri demokrat propozon një listë me shtatë pika që sipas tij do të nxjerrin vendin nga situata. Këtu përfshihet, “heqja e taksës Rama prej 240 lekë për litër karburanti; ulja e TVSH-së nga 20% në 6% për ushqimet; faturimi me çmime dhe sasinë reale të konsumit të oligarkëve të cilët favorizohen në kurriz të konsumatorëve; subvencionim i çmimit të energjisë për qytetarët; mirëmenanxhim dhe ndalje e shpenzimeve të shfrenuara, luksoze të OSHEE dhe KESH; ristrukturim të buxhetit, dhe më shumë para për shtresat në nevojë dhe ristrukturim të ekonomisë aktuale”.
Kjo deklaratë vjen pak pasi kryeministri Rama iu drejtua qytetarëve me një mesazh në lidhje me rritjen e çmimit të karburanteve që sipas tij po vjen si pasojë e një krizë të jashtëzakonshme energjetike, ku pritet të ketë rritje të çmimit brenda gjashtë mujorit të parë të vitit të ardhshëm.
Rama tha se kjo fatkeqësi e re ka sjellë një rritje të jashtëzakonshme të çmimeve e jo vetëm të karburanteve, gazit, karbonit e naftës, por edhe mallrave të konsumit që po diktohet nga manovrat tregtare dhe faktorët e tjerë gjeopolitikë. Për Shqipërinë, çmimi mesatar vjetor i blerjes së energjisë nga importi, është thuajse trefishuar në krahasimin me vitin e kaluar.
