Rama shpërblen Afrim Qendron, emërohet prefekt i Tiranës

Afrim Qendro  me vendim të Këshillit të Ministrave është zgjedhur prefekt i Tiranës. Qendro ka drejtuar Autoritetit Rrugor Shqiptar.

Ish-kreu i Autoritetit Rrugor Shqiptar Afrim Qendro u shkarkua nga detyra më 22 janar të vitit 2019, por më vonë u emërua nga kryeministri Edi Rama si nënkryetar i Bashkisë Vlorë.

Rama caktoi Qëndron si nënkryetar, në cilësinë e të besuarit të tij pas përplasjeve me kryetarin e Bashkisë, Afrim Leli.

Rama ka shprehur mosbesim ndaj punës së Lelit, e këtë e ka thënë hapur, ndaj Afrim Qëndro do të shërbente si monitoruesi i punës së Lelit në këtë bashki.

 Kujtojmë që Afrim Qëndro u shkarkua nga vetë Rama në kohën që drejtonte ARRSH-në. Madje, nuk u lejua të shkonte më në zyrë as për të dorëzuar detyrën.

Në atë kohë Qendro ka qenë një nga emrat e përfolur, pas shpërthimit të skandalit me “DH Albania”. Ndërkohë , drejtori i Operatorit të Sistemit të Transmetimit Klodian Gradeci dha dorëheqjen, sërish pas një skandali lidhur me “DH Albania”. Kjo pasi kjo firmë mori tenderin prej 12 mln eurosh për një linjë energjitike. Pas daljes së fakteve, tenderi u anulua.