Nga Hysni Gurra
Edi Rama, njeriu që përzuri jo vetëm 1 milionë shqiptarë nga vendi, por edhe mbi 1 milionë bagëti — po, po, edhe lopët dhe delet u lodhën nga “rilindja” e tregojnë të dhënat e INSTAT këtë — tani na paska filluar të shqetësohet për bidonat e qumështit që shesin fshatarët e shkretë në rrugë.
Dhe jo vetëm që shqetësohet, por del e na paralajmëron me patetizëm se do t’ua konfiskojë, sepse “është vapë” dhe “populli mund të helmohet”.
Ironia është se, njeriu që nuk u shqetësua për shëndetin e popullit kur lejoi që Shqipëria të mbillej me drogë nga veriu në jug, tani na del si mbrojtës i higjienës publike.
Njeriu që nuk u shqetësua kur përmes aferës së inceneratorëve u zhdukën miliona euro të shqiptarëve, e sot qytetarët marrin erën e plehrave që digjen në natyrë, në mes të qyteteve — tani na bën moral për bidonat e qumështit.
Njeriu që nuk u shqetësua kur nëpër doganat e tij kalonin tonelata mish me salmonelë e ushqime të skaduara, tani del e thotë se qumështi i fshatarit është kërcënim për popullin.
Sot, Edi Rama është kthyer në një dispeçer të qumështit pluhur, atë që prodhojnë e shesin masivisht fabrikat vendase, që përveç fotos së lopës në reklama, nuk kanë lidhje tjetër me qumëshin.
Dhe mesa duket këtë e bëkan nën hyqmin e kryeministrit, që me sa duket e ka më afër zemrës importin e kompanive të mëdha sesa lopët e fshatarit që mezi mbijetojnë.
Mos ndoshta qumështi i freskët pa faturë, pa asnjë subvension nga qeveria e Ramës, por vetëm me djersën e mundin e fshatarëve po i prish punë ndonjë monopoli të importit?
Sepse në Shqipërinë e Edi Ramës, fshatari është armik, qytetari është dele, dhe vetëm oligarku është mik. Dhe jo mik dosido, por mik që nxjerr kryeministrin të flasë si shpërndarës i qumështit pluhur.
A thua vallë është shëndeti i popullit arsyeja e vërtetë?
A ka më idiotë në këtë vend që e besojnë këtë? (Pyetje retorike, se sigurisht që ka, dhe shumë bile).
Discussion about this post