Rama: Sot do isha në çmendinë nëse…

Kryeministri Edi Rama në një intervistë të dhënë për të përditshmen “LIBERO” e konsideron si mjaft të rëndësishme për të angazhimin me art.

Duke iu përgjigjur pyetjes nëse jashtë politikës merret me art, Rama u përgjigj “po sigurisht, përndryshe do të isha tanimë në çmendinë”.

Kreu i qeverisë shqiptarë ka folur për disa çështje, duke u ndalur tek raportet me kryeministren e Italisë, Giorgia Meloni, për të cilën thotë se “të gjithë prisnin një përbindësh fashist, por në të vërtetën u përballën me një evropiane”.

Si socialist, i pyetur se cili është dallimi mes të djathtës italiane dhe asaj shqiptare, Rama u përgjigj “të qenit i majtë nuk më pengon të bëj zgjedhje që pastaj mund të interpretohen si të djathta”.

Kryeministri solli në memorie edhe disa momente nga periudha e komunizmit, sic ishte koha kur shikoheshin televizionet italiane apo dëgjohej muzikë e këngëtarëve të njohur të Italisë.