Në kuadër të vizitës zyrtare që po zhvillon në Spanjë, kryeministri Edi Rama është takuar pasditen e së hënës me homologun Pedro Sánchez.
Gjatë takimit, dy kryeministrat kanë nënshkruar dy marrëveshje, Memorandumin e mirëkuptimit ndërmjet Këshillit të Ministrave të Republikës së Shqipërisë dhe Qeverisë së Mbretërisë së Spanjës, për bashkëpunimin në çështjet e arsimit të lartë, si dhe Marrëveshjen si shtesë e konventës evropiane për ekstradimin e vitit 1957.
Rama shkruan në Facebook se kjo vizitë hap një faqe të re në marrëdhëniet “me potencial të lartë bashkëpunimi politik, ekonomik e kulturor mes Spanjës dhe Shqipërisë.”
Në Spanjë, kreu i qeverisë pritet të diskutojë edhe për qëndrimin që do të mbahet në raport me Maqedoninë e Veriut, në lidhje me procesin e integrimit në Bashkimin Europian. Pas Spanjës, kryeministri Rama niset direkt për në Slloveni, ku më 6 tetor organizohet samiti BE-Ballkani Perëndimor, për të ardhmen Europiane të Ballkanit.
