Kryeministri Edi Rama ndodhet sot në Budapest nga ku ka dalë edhe në një deklaratë të përbashkët për median me kryeministrin e Hungarisë, Viktor Orbán.
Në fjalën e tij, Orbán theksoi ndër të tjera se Shqipëria ka mbështetjen e plotë të Hungarisë për anëtarësimin në Bashkimin Evropian. Kryeministri hungarez e ka përgëzuar Ramën për suksesin dhe fitoren e tij, ndërsa solli në vëmendje se së shpejti bëhen 100 vjet nga vendosja e marrëdhënieve diplomatike mes dy vendeve.
Gjithashtu, kreu i ekzekutivit në Hungari bëri të ditur se në takimin me homologun e tij shqiptar ranë dakord se nuk ka dallime madhore në politikën e jashtme mes dy vendeve.
Viktor Orbán theksoi se Hungaria e mbështet fuqishëm anëtarësimin sa më të shpejtë të Shqipërisë në BE jo vetëm nga simpatia, por edhe për interesin e tyre.
“Mbetemi të angazhuar që ta ndihmojmë Shqipërinë të bëhet pjesë e BE, të motivuar jo vetëm nga simpatia por edhe nga interesi ynë. Nuk stabilizohemi dot pa integruar këtë pjesë të Ballkanit. Shqipëria luan një rol të rëndësishëm në të ardhmen tonë evropiane.”
