Kryetari i Grupit parlamentar të Partisë Demokratike, Gazment Bardhi tha mbrëmjen e së hënës në emisionin “Noë” se nuk do të luajë lojën e Edi Ramës dhe Erion Veliajt, por do të luftojë për ata që e kanë besuar duke i dhënë votën.
Ndërkohë, ai theksoi se kryeministri dhe kryebashkiaku po sponsorizojnë përçarjen e opozitës.
“Kur bëj kalkulimet e mia politike them kush është kundërshtari im politik? Është Edi Rama dhe Erion Veliaj të cilët po sponsorizojnë për ta mbajtur të përçarë opozitën. Tani unë do luaj lojën e Erion Veliajt? Jo!
Do luaj lojën e atyre që më kanë votëbesuar si opozitar. Unë nuk do luaj lojën e Erion Veliajt, lojën e Edi Ramës, lojën e Taulant Ballës.
Unë do të luaj lojën e atyre që kanë sakrifikuar me mua 10 vite në opozitë”, u shpreh Bardhi.
Ndërkohë lidhur me vendimin e Gjykatës së Tiranës, që pezulloi regjistrimin e statutit të Kuvendit të 2 shtatorit të thirrur nga Lulzim Basha, Bardhi tha se ky vendim tregon se ai “eventi familjar që e zgjodhi Bashën kryetar” nuk ka asnjë vlerë.
Discussion about this post