Në takimin me furnizuesit e naftës, kryeministri Edi Rama, ka zbuluar pesë zyrtarët që do të jenë pjesë e bordit që do të vendosë për çmimet e naftës dhe karburanteve të tjera në vendin tonë.
Gjatë fjalës së tij, Rama tha se pjesë e bordit do të jenë ministrja e Financave Delina Ibrahimaj, ministrja Belinda Balluku, dy drejtorët e Tatimeve dhe Doganave, si dhe kreu i Autoritetit të Konkurencës, Denar Biba, ndërsa do të ketë pesë përfaqësues dhe nga biznesi.
“Përmes një bordi kombëtar, ju dhe qeveria çdo ditë, ministrja e Financave, e Infrastrukturës dhe Energjisë, drejtori i Tatimeve dhe Doganave, dhe kreu i Autoritetit të Konkurrencës, dhe 5 nga ju, do të jeni në një tavolinë. Nëse dikush vendos një çmim që nuk është miratuar nga bordi, atëherë do të humbasë pikën e karburantit. Unë besoj se liria ekonomike është themelore, dhe nuk i besoj shtetit që hyn për të rregulluar çmimet. Ajo që na kërcënon më shumë, nuk është çmimi, por mungesa e furnizimit. Ne do të bëjmë transparencë të përditshme në lidhje me çmimin, që njerëzit ta kuptojnë që çdo qindarkë është aty”, tha Rama.
Ndër të tjera, kryeministri tha se nëse një pikë karburanti do të ketë një çmim më të lartë se ai i miratuar nga Bordi, që do të funksionojë përmes një akti normativ, atëherë biznesi do të mbyllet nga shteti.
Discussion about this post