Anija e qeverisë po lundron në batica të larta, duke u përplasur nga njëri skandal në tjetrin. Pas “dezertimit” të Engjëll Agaçit nga posti i sekretarit të përgjithshëm të Këshillit të Ministrave, Edi Rama ka vendosur të t’ia besojë këtë detyrë Vilma Gurit.
Ndonëse mediat pranë qeverisë nxituan ta paraqisnin Gurin si një personalitet me eksperiencë të pasur në Departamentin e Shtetit dhe Ambasadën Amerikane në Tiranë, faktet janë pak ndryshe.
Kapitali ka mësuar se zonja Guri para pak muajsh është shkarkuar nga Ambasada Amerikane për shkelje të rëndë të etikës, pasi është përfshirë në një skandal presionesh mbi Gjykatën Kushtetuese. Burime diplomatike i thanë Kapitalit se ky skandal përfshin zonjën Guri, bashkëshorten e një gjyqtari në Gjykatën Kushtetuese si dhe një deputete të Edi Ramës.
Pas sharkimit për shkelje të rëndë të etikës nga Ambasada Amerikane, zonja Guri fillimisht u strehua si këshilltare e ministrit të Brendshëm, Ervin Hoxha. Por kjo detyrë zgjati më pak se 2 muaj pasi në qeveri u krijua një tjetër emergjencë.
Engjëll Agaçi, sekretari jetëgjatë i përgjithshëm i Këshillit të Ministrave, që e ka mbajtur këtë post nga dita e parë kur Edi Rama u bë kryeministër, është larguar në mënyrë të beftë. Vetë qeveria përmes një lajmi të shpërndarë në mediat e saj pak ditë më parë, jo zyrtarisht dha si arsye për largimin e Agaçit, problemet shëndetësore dhe kurimin e tij në Itali.
Por ky version është vënë në pikëpyetje të madhe, jo vetëm nga opozita. Një ditë më parë, Sali Berisha denoncoi publikisht si Engjëll Agaçi është arratisur për shkak se ndaj tij është lëshuar masë ndalimi nga SPAK. Ky version në fakt kishte disa ditë që qarkullonte në Tiranë, por edhe pas denoncimit të Berishës nuk u përgënjeshtrua zyrtarisht nga qeveria.
Por pavarësisht shkaqeve të largimit, e sigurtë është se prej gati 1 muaji Engjëll Agaçi nuk është më në postin e Sekretarit të Përgjithshëm të Këshillit të Ministrave. Dhe fakti që Edi Rama ka nxituar të gjejë zëvendësen e tij, sinjalizon se ky largim mund të jetë përfundimtar.
Kjo tani ngre një tjetër skenar interesant. Nëse arsyet e largimit të Agaçit lidhen me një masë të mundshme të SPAK ndaj tij, kjo do të ishte një goditje shumë e fortë për qeverinë. Sekretari i Përgjithshëm i Këshillit të Ministrave, ligjërisht ka vetëm një detyrë. Të mos lejojë daljen e vendimeve të paligjshme nga qeveria.
Por nëse sekretari shpallet në kërkim nga drejtësia, kjo hedh një damkë të madhe mbi qeverinë, e cila automatikisht dyshohet të ketë funksionuar si një një bandë kaçakësh, duke miratuar vendime të paligjshme. Dhe rastet për këtë tashmë janë publike duke filluar nga bonusi i inceneratorit që iu dha kompanisë, e cila nuk ekzistonte.
/Kapitali.al/
Discussion about this post