Ramazan Rraja kërkon lirinë, Apeli e lë në burg

Gjykata e Posaçme e Apelit për Korrupsionin dhe Krimin e Organizuar ka rrëzuar kërkesën e Ramazan Rrajës për ndryshimin e masës së sigurisë.

Rraja, i cili ndodhet pas hekurave nën masën e sigurimit të arrestit me burg, kërkoi në gjykatë lirimin nga qelia, duke ndryshuar masën e sigurisë në arrest shtëpie, ose detyrim paraqitje.

Këtë të premte, gjyqtarja Saida Dollani vendosi mospranimin e kërkesës së nipit të ish deputetit socialist Rrahman Rraja.

Ramazan Rraja u arrestua si person i përfshirë në atentatin ndaj ish-prokurorit të Durrësit Arjan Ndoja.

Arrestimi

Ramazan Rraja, në kërkim për atentatin ndaj ish-prokurorit Arjan Ndoja dhe Rrumit të Shijakut, u vu në pranga nga policia në prill të vitit të kaluar.

Policia njoftoi asokohe se nipi i deputetit socialist Rrahman Rraja u vu në pranga në një lokal në Fushë-Krujë. Me vete iu gjet një pistoletë me fishek në fole. Sipas bluve, 30-vjeçari, që nga momenti i shpalljes në kërkim, nuk është larguar në asnjë moment jashtë shtetit, por fshihej në trekëndëshin  “Durrës – Lezhë – Tiranë”.

Atentati

Në 1 Nëntor 2019, në autostradën Durrës-Tiranë, pranë mbikalimit të Shkozetit, është qëlluar me armë ndaj makinës në lëvizje ku ndodheshin ish-prokurori i Durrësit Arjan Ndoja, Aleksandër Laho i njohur si Rumi dhe Andi Maloku, shoferi i magjistratit.

Nga të shtënat, Maloku humbi jetën, ndërsa Ndoja dhe Laho u plagosën.

Disa persona janë arrestuar lidhur me ngjarjen.