Në korrik të vitit 2024, Kuvendi i Shqipërisë i dha dritën jeshile ndryshimeve në ligjin për ‘Për veprimtarinë e sigurimit dhe risigurimit’. Ky ligj i lobuar gjerësisht nga sektori privat pati disa ndryshime thelbësore dhe kishte si synim përafrimin me direktivat e Bashkimit Evropian. Dy risitë më të mëdha të ligjit ishin dëshmpërblimet më të larta në rast aksidenti, ngritja e një fondi kompesimi në varësi të Autoritetit të Mbikqyrjes Financiare, që të garantonte qytetarët në rast se kompania e sigurimeve nuk do ti paguante, përfshirë edhe rregulla të reja për transparencën ku kompanitë detyroheshin që të publikojnë tarifat dhe praktikat e dëmshpërblimit.
Por çfarë ndodhi? Një raport i detajuar i Autoritetit të Mbikqyrjes Financare zbulon se me hyrjen në fuqi të ligjit të ri, përgjatë vitit 2025, kompanitë private të sigurimeve fituan rreth 11 milionë euro më shumë, krahasuar me një vit më pare, ndërsa dëmshpërblimet në total mbetën në rreth 23 milionë euro, pra njësoj me vitin 2024.
“Të ardhurat nga primet e shkruara bruto të sigurimit për janar – korrik 2025 kapën vlerën 15,473 milionë lekë, ose 8.98% më shumë se në janar – korrik 2024. Gjatë periudhës janar – korrik 2025, numri i kontratave të sigurimit të lidhura arriti në 929,459 me një rritje prej 6.81% krahasuar me të njëjtën periudhë të një viti më parë.”-thuhet në raportin e AMF.
Pra, rritja e çmimeve nuk po kthehet te qytetarët në formën e dëmshpërblimeve. Kjo do të thotë se kompania arkëton më shumë, qytetari paguan më shumë por kthimi në dëmshpërblime nuk është i njëjtë.
“Gjatë periudhës janar – korrik 2025, dëmet e paguara bruto në tregun e sigurimeve, arritën në rreth 4,804 milionë lekë, ose 0.90% më shumë se në janar – korrik 2024.”-thuhet më tej.
Pas hyrjes së ligjit, kompanitë nisën rritje graduale të çmimeve, duke u justifikuar me kërkesën për kapital më të madh dhe dëmshpërblime të rritura.
Kjo është arsyeja pse në raportin e AMF për 2025 shohim rritje 9% të primit, por pa rritje reale të dëmshpërblimeve. Në raport shihet se primet janë rritur me 8.90% ndërsa dëmet me paguara me 0.9%.
Ky ndryshim duket se ka çuar ujë në një burim, që në këtë rast është kompania që ka zaptuar tregun për vitin 2025. Është kompania Sigal, e cila dominon tregun e sigurimeve në vend. Sigal ka rreth 38-40% të totalit të primeve në vend.
Si është i ndarë tregu i sigurimeve të detyrueshme?
60% e tregut të sigurimeve dominohet nga sigurimi i makinave, MTPL. Krahasuar nga viti 2024, kur u lidhën 378 181 kontrata MTPL, në të njëjtën periudhë në vitin 2025, janë lidhur 412 248 të tilla.
Ndërkohë që sigurimet vullnetare, shëndeti, jeta prona sipas të dhënave zënë vetëm 40% të portofolit, duke ngritur një dyshim se në fakt qytetarët nuk blejnë siguracion sepse i besojnë por vetëm sepse detyrohen nga ligji. Rënie ka edhe në Sigurimin për Zjarret dhe Forcat e Natyrës.
Ndërkohë që AMF ka publikuar shifrat për primet dhe dëmshpërblimet, raporti nuk ka marrë në konsideratë një tjetër fakt. Sa kërkesa për dëmshpërblim janë refuzuar, sa janë vonuar dhe sa janë në proces gjyqësor. A nuk është pikërisht ky problemi më i madh i konsumatorëve?
Discussion about this post