Deputeti i Partisë Demokratike, Dashnor Sula, ka reaguar pas raportit të DASH për ekonominë shqiptare, ku thuhej se korrupsion po rrezikon një krizë financiare më të madhe. Sula ka akuzuar kryeministrin Edi Rama se në një kohë që ai ka marrë pushimet “në sarajet e tij”, korrupsioni vijon të dëmtojë vendin. Duke iu referuar raportit më të fundit të Departamentit Amerikan të Shtetit, Sula thekson se janë përkeqësuar treguesit ekonomik të Shqipërisë në 10 vitet e fundit prej korrupsionit endemik në administratën shtetërore, në gjyqësor dhe konkurrencës së pandershme. Sipas deputetit të selisë blu, të ardhmen në Shqipëri e shohin vetëm 4-5 klientët kryesore që përfitojnë nga tenderët dhe koncesionet e qeverisë, dhe trafikantët e drogës.
“Qeveria e regresit! Sulltani ka ditë që nuk po ndihet. Ka marrë pushimet e ka shkuar në sarajet e tija. Por korrupsioni vazhdon. Kryeministri mendon se do ta kalojë në heshtje, por e siguroj se gabon rëndë. Situata është tejet e rendë dhe për këtë përgjegjësi të drejtpërdrejtë ka qeveria. Në mënyrë të vazhdueshme kam denoncuar në bazë të informacioneve dhe fakteve, korrupsionin dhe politikat dashakeqëse të kësaj qeverie. Kanë qenë me fakte. Nuk kam pasur dyshim për ato qe kam denoncuar bashkë edhe me shumë nga kolegët e mi të opozitës. Por sot po reagoj sepse të gjitha ato që kemi denoncuar ditë pas dite u konfirmuan edhe nga raporti i DASH. Departamenti Amerikan i Shtetit, etaloni i së vërtetës publikoi mbrëmë Raportin për korrupsionin dhe perceptimin e të bërit biznes”, tha ai.
Ndërsa tha më tutje se bizneset po shkojnë të gjithë drejtë falimentit dhe po mbijetojnë vetëm ato që janë klientë të sulltanit Edi Rama. “Korrupsioni endemik në administratën shtetërore, në gjyqësor, ekonomia informale, konkurrenca e pandershme ishin disa nga shqetësimet që përshkruheshin për vendin tonë. Në 10 vite qeverisje të SULLTANIT treguesit vetëm janë përkeqësuar. Por sërish Kryeministri përgjegjësinë e hedh diku tjetër. Me siguri edhe për këtë Raport Rama do thotë se është “copy paste” nga viti i kaluar. Por në fakt e vërteta është se nuk është copy paste, sepse treguesit janë përkeqësuar. Në Shqipëri biznesi i ndershëm e ka çdo ditë e më shumë të vështirë që të mbijetojë. Këtu po ecin vetëm 3-4 klientët e qeverisë dhe ata që po pastrojnë paratë e kokainës. Para pak ditës e pamë sesi bosi i drogës që u kap në Spanjë kishte marrë tenderë publik në Shqipëri. Trafikanti u godit nga autoritetet e Spanjës sepse këtu ai ishte biznesmen i nderuar me tenderë rindërtimi e ndërtues pallatesh”, tha ai. Ndërsa , i bëri thirrje SPAK të veprojë dhe të marrë për bazë për të nisur hetimet gjetjet e DASH.
Discussion about this post