Gjatë vizitës në Kosovë, kryeministri Edi Rama u shpreh se Shqipëria do të reagojë jo vetëm me fjalë, por edhe me veprime konkrete mbështetjen ndaj Kosovës, duke miratuar një rezolutë në Kuvendin e Shqipërisë, për të vërtetuar se akuzat e ngritura në raportin e Dick Martyn nuk janë të vërteta, pasi ish-krerët e UÇK-së nuk janë marrë me trafik organesh njerëzore, ku më pas do t’i shkojë Këshillit të Europës e për pasojë KiE duhet të distancohet.
“Do shkoj dhe unë personalisht për të ngritur çështjen atje, që t’i kërkojmë Kie që të distancohet nga raporti i Dick Marty se nuk ka asnjë provë”, tha Rama, ndërsa qeveria e tij në kaq vite nuk ka bërë një rezolutë që të dënojë krimet serbe në Kosovë.
Kreu i qeverisë ka pasur një mesazh për ndërkombëtaret, nga Joe Biden te liderët e BE-së, por edhe për kryeministrin britanik Boris Johnson. Rama u shpreh se aleatët perëndimorë, të cilët kanë ushtruar presion për ngritjen e Gjykatës Speciale në Hagë, duhet të reflektojnë se kjo gjykatë është një grackë e Rusisë. Rama ngriti pyetjen: ‘A është kjo gjykatë pa asnjë lidhje me dorën e Putin dhe Moskës? Sipas tij, ngritja e saj ka pasur vetëm një qëllim, diskreditimin e UÇK.
“Shpresoj dhe gjithë pjesa tjetër e Parlamentit, do të bëjmë çmos që ta vendosim mu përballë të gjithëve, që nga Joe Biden që është dhe një mik i Kosovës te Boris Johnson, tek Olaf Scholtz dhe gjithë të tjerët me radhë, kuptohet duke përfshirë Macron dhe kë tjetër të doni ju. Pyetja është kjo, si shpjegohet që një tribunal i ngritur si rezultat fundor i një raporti që mori bekimin e Këshillit të Europës, me gjithë akuzat që kishin në qëndër këtë shtëpinë e verdhë, kanë nxjerrë një akt-akuzë që nuk ka asnjë lidhje as me shtëpinë e verdhë, as me organe, as me jo organe dhe asgjë tjetër”, tha Rama.
Në përmbyllje të agjendës në kuadrin e tryezës së përbashkët Shqipëri-Kosovë, Rama mori pjesë këtë pasdite në ceremoninë e prezantimit të librit “Përplasja e Madhe”, e shkruar nga një prej figurave të njohura të jetës politike në Kosovë, Enver Hoxhaj. Libri është një analizë politike e detajuar që flet për luftën diplomatike dhe informative të Rusisë kundër Kosovës dhe Ballkanit.
Discussion about this post