Presidenti i Republikës, Ilir Meta ka reaguar gjithashtu në lidhje me raportin e fundit të “Transparency International”, për Indeksin e Perceptimit të Korrupsionit në botë, ku Shqipëria ka pasur një rënie prej një pike në krahasim me vitin e kaluar, nga 36 në 35 pikë.
Përmes një postimi në Facebook, Meta shkruan se këto janë të dhëna që tregojnë se situata e demokracisë në vend është e rëndë, situatë që sipas tij, ai e ka paralajmëruar më herët dhe kërkon reflektim të menjëhershëm.
“Këto të dhëna, për fat të keq, përputhen plotësisht me bindjen dhe perceptimin e përgjithshëm të qytetarëve, por edhe me paralajmërimet që kam bërë prej kohësh sa i përket nivelit të ulët të demokracisë në vend, mungesës së respektimit të lirive dhe të drejtave të njeriut, shfrytëzimit të pandemisë për të forcuar autoritarizmin, mungesën e llogaridhënies në të gjitha nivelet, abuzimet me fondet publike nëpërmjet koncensioneve, PPP-ve dhe inceneratorëve, situatë e rëndë që vijon të vrasë shpresën dhe të detyrojë gjithmonë e më shumë shqiptarë të largohen nga vendi, për ta ndërtuar jashtë Shqipërisë të ardhmen e tyre. Gjendja është shumë e rëndë dhe kërkon reflektim të menjëhershëm, efektiv dhe të përgjegjshëm!”, shkruan Meta.
Kreu i shtetit, ndër të tjera në reagimin e tij ka krahasuar vendin me Maqedoninë e Veriut dhe me Kosovën të cilat kanë shënuar progres në këtë drejtim.
Discussion about this post