Pak ditë më parë, kryeministri Edi Rama, gjatë Panairit të Punës në Athinë, deklaroi se rrogat në Shqipëri janë më të larta se në Greqi dhe vende të tjera të Rajonit dhe ftoi emigrantët që të kthehen në Atdhe për të jetuar e punuar.
Por një raport i fundit nga Eurostat nxjerr blof Ramën dhe tregon se punonjësit shqiptarë janë ndër më të nënpaguarit në Europë, si për pagën orare ashtu edhe për fuqinë blerëse.
Sipas raportit për vitin 2022, shqiptarët fitojnë 2.47 euro në orë, duke u renditur shumë më poshtë se vendet e rajonit si Serbia (4.43 euro/orë) dhe Bosnja (4 euro/orë). Paga për orë në Shqipëri është gjithashtu shumë më e ulët se sa në vendet e Bashkimit Europian, ku paga mesatare është shumë më e lartë, si në Danimarkë (29.8 euro/orë) dhe Luksemburg (24 euro/orë).
Femrat në Shqipëri paguhen 2.63 euro në orë, ndërsa meshkujt 2.39 euro, sipas statistikave të Eurostat.
Ndërsa paga orare për Shqipërinë është më e ulët, fuqia blerëse është gjithashtu shumë më e kufizuar. Për çdo orë pune, një punonjës shqiptar mund të blejë më pak produkte dhe shërbime se sa në vendet fqinje të rajonit. Shqipëria renditet e fundit në rajon, me një pagë orare të matur sipas fuqisë blerëse (PPS) prej 4.62, duke lënë pas vende si Serbia dhe Bosnja, ku kjo shifër është më e lartë.
Në anën tjetër, raporti i Eurostat tregon se diferencat e pagave mes vendeve të BE-së janë të konsiderueshme. Paga mesatare bruto për orë është 7.4 herë më e lartë në vendin me pagën më të lartë krahasuar me atë më të ulët. Ky diferencim tregon nevojën për përmirësime në politikën ekonomike dhe sociale për të rritur standardin e jetesës për punonjësit shqiptarë dhe për të siguruar rritje të pagave dhe fuqisë blerëse.
Discussion about this post