UNDP-ja, programi në Kosovë, ka publikuar raportin “Përmbledhja e Pulsit Publik XXIII” nga i cili rezulton se ka një rënie të mbështetjes së qytetarëve me performancën e qeverisë, por edhe me atë të legjislativit dhe gjyqësorit.
Sipas këtij raporti, ka një rënie prej 7.7 pikë të përqindjes së mbështetjes për performancën e kryeministrit për një periudhë gjashtëmujore, ndërkaq edhe për performancën e qeverisë ka rënie prej 6.2 pikë të përqindjes.
“Në anketën e opinionit tetor-nëntor 2022, niveli i mbështetjes me performancën e kabinetit ekzekutiv kapi vlerën prej 41%, një rënie për 6.2 pikë përqindjeje nga anketa e prillit 2022 kur ishte 47.2%. Niveli i mbështetjes me punën e Kryeministrit kapi vlerën prej 44.9%, një rënie për 7.7 pikë përqindje nga prilli 2022 kur ishte 52.6%”, thuhet në raport.
Gjithsej 31.2% e të anketuarve besojnë se vota e tyre mund të sjellë ndryshime ndërsa 69% e të anketuarve do të votonin, nëse zgjedhjet qendrore do të zhvilloheshin së shpejti.
“8.9% e të anketuarve thanë se dinë shumë për sa i përket të drejtës për të jetuar në një mjedis të shëndetshëm, 26.2% pohuan se kanë njohuri mesatare, kurse 46.1% e të anketuarve thanë se dinë pak për këtë temë.
Gjithsej 18.8% thanë se nuk kanë njohuri për këtë temë. Gjetjet tregojnë që 80.4% të të anketuarve ndihen të sigurt kur janë jashtë në rrugë, në aspektin e dhunës dhe krimit potencial.
Të dhënat e zbërthyera sipas gjinisë treguan se meshkujt (81.1%) ndihen më të sigurt kur janë jashtë sesa femrat (79.8%)”, thuhet në komunikatë.
Discussion about this post