Arrestohet në Gjirokastër 30 vjeçari nga Kosova Leotrim Xhekaj. I riu u kap në flagrancë teksa përpiqej të transportonte 5 emigrantë të paligjshëm. Në njoftimin e policisë thuhet se gjatë 24 orëve të fundit ky ka qenë rasti i tretë i dhënies së ndihmës për kalim të paligjshëm kufiri në këmbim të pagesës.
Njoftimi i plotë:
DVP Gjirokastër/Goditet brenda 24 orësh, rasti i tretë i veprimtarisë kriminale të dhënies ndihmë shtetasve të huaj, për kalim të paligjshëm të kufirit, kundrejt fitimit.
Finalizohet me sukses operacioni policor i koduar “Road Guard 41”.
Transportonte 5 emigrantë të paligjshëm, vihet në pranga 30-vjeçari kosovar, Leotrim Xhekaj.
Sekuestrohen 1 automjet dhe 1 aparat celular.
Specialistët e Seksionit për Hetimin e Trafiqeve të Paligjshme në DVP Gjirokastër, në bashkëpunim me Seksionin Operacional, në vijim të punës për goditjen e aktivitetit kriminal të dhënies ndihmë shtetasve të huaj, për kalim të paligjshëm të kufirit, kundrejt fitimit, si rezultat i një pune hetimore me metoda proaktive, nën drejtimin e Prokurorisë, kanë organizuar dhe finalizuar me sukses operacionin policor të koduar “Road Guard 41”, si rezultat i të cilit u bë arrestimi në flagrancë i shtetasit L. Xh., 30 vjeç, banues në Kosovë.
Arrestimi i shtetasit L. Xh. u bë pasi është kapur në flagrancë nga shërbimet e Policisë, në aksin nacional Gjirokastër-Tepelenë, në vendin e quajtur “Shtëpëz”, duke transportuar me automjetin e tij, 5 emigrantë të paligjshëm nga vendet MENA, kundrejt shumës 250 euro për person.
Në cilësinë e provës materiale u sekuestruan automjeti dhe një aparat celular.
Materialet i kaluan Prokurorisë pranë Gjykatës së Shkallës së Parë Gjirokastër, për veprime të mëtejshme.
Discussion about this post