Që Erion Veliaj është kandidati më i dobët i Partisë Socialiste për Tiranën në zgjedhjet lokale të vitit të ardhshëm, e konfirmon edhe zgjedhja e Ramës për të promovuar kandidatura të tjera brenda kësaj partie. Vetë Veliaj mundohet të mbajë radhët ngjeshur duke bindur të tijët që Edi Rama ka frikë nga ai, prandaj po mundohet të sabotojë kandidimin në zgjedhjet lokale të radhës. Sigurisht që Rama e di këtë dhe pranon ta dëgjojë vazhdimisht si arsye shtesë për të qeshur me të emëruarin e tij në krye të Bashkisë së Tiranës.
Prej shumë kohësh, një grupim njerëzish të fuqishëm në Partinë Socialiste kanë vendosur të bashkojnë forcat për të larguar Erion Velinë nga kupola e pushtetit. Në fakt, ky i fundit nuk ka asnjë lidhje me trashëgimtaren e Partisë së Punës. Ai nuk vjen nga asnjë prej familjeve të Byrosë Politike apo Bllokut të dikurshëm. Në politikë, ai ka hyrë si sabotator i pushtetit të socialistëve dhe si bashkëpunëtor i Berishës. Ndërsa në krye të Bashkisë së Tiranës ai ka sjellë një grupim njerëzish të afërt me të dhe pa asnjë lidhje me trupin elektoral e politik të partisë që i ka dhënë dy mandate si kryebashkiak i kryeqytetit.
Edhe pse shpeshherë kanë qenë nën goditjet e Ramës, ky grupim nuk është dobësuar aspak brenda Partisë Socialiste. Përkundrazi, duke parë edhe lidhjen e fortë ndërmjet Ramës dhe Veliajt, ata kanë shtuar përpjekjet për të zhdukur politikisht Veliajn sepse janë të vetëdijshëm se nëse ai merr Partinë Socialiste, aty nuk do të ketë më vend për ta. Gjithashtu kryebashkiaku njihet si politikan i pamëshirshëm ndaj rivalëve, kundërshtarëve dhe kritikëve. Prandaj ata e dinë se me pushtetin e tij të madh në drejtësi, fati i tyre është i përcaktuar.
Ky grupim i përbërë nga ministra e ish-ministra, deputetë e ish-deputetë, sipërmarrës dhe baza e Partisë Socialiste kanë tashmë edhe kandidaturat e tyre për Bashkinë e Tiranës. Edhe lëvizjet e fundit në qeveri, nuk e kanë prekur aftësinë e këtij grupimi për të projektuar influencë dhe pushtet brenda partisë së tyre dhe në opinionin publik. Për këtë arsye, duket qartë se përcaktimi i kandidatit të Partisë Socialiste për Tiranën nuk do të jetë një sfidë e lehtë për Edi Ramën. Ka shumë gjasa që grupi i politikanëve të lartë socialistë t’i lërë Ramës zgjedhjen ndërmjet qeverisë ose Erion Veliajt.
Megjithatë, një zhvillim tjetër i madh në korridoret e drejtësisë po e përcakton jo pak kandidatin e të majtës për Bashkinë e Tiranës. Dosja e inceneratorëve dhe disa dosje të tjera të nxehta duket se do të hanë kokat e shumë figurave të rëndësishme në të majtë të politikës shqiptare. Megjithëse këto dosje do të prekin si kundërshtarët e Veliajt, ashtu edhe grupin e tij, Veliaj është një ndër më të rrezikuarit prej këtyre proceseve. Ndërkohë në grupimin kundërshtar, disa figura potenciale për të rivalizuar nga brenda partisë kryebashkiakun e Tiranës duket se do të dalin të paprekur.
Paralelisht me kushtëzimin e votës në Parlament për qeverinë Rama, kundërshtarët e Veliajt kanë në dorë edhe gurin edhe arrën kur vjen puna tek dosja e inceneratorëve. Fjala bie, edhe pse Ahmetaj u shkarkua dhe disa media të sponsorizuara nga Veliaj e kanë projektuar si një prej të arrestuarve të vjeshtës nga SPAK, dihet botërisht, edhe me konfirmim nga opozita, se Ahmetaj nuk ka asnjë përgjegjësi në atë dosje. Ai ishte burimi kryesor i informacioneve që rridhnin drejt opozitës apo medias lidhur me këtë aferë. Ndëshkimi për këtë ishte largimi nga qeveria.
Nga ana tjetër, kryebashkiakut të Tiranës do t’i duhet shumë luftë për të shpëtuar kokën e tij nga satra e drejtësisë së reformuar. Nuk dihet se sa janë provuar nga anti-mafia italiane lidhjet e tij me pastrimin e parave të Ndragheta-s me ndërtimet e larta në Tiranë. Pastrimi i qytetit është gjithashtu një skemë shumë e diskutueshme dhe bashkia e drejtuar nga Veliaj ka krijuar disa ortakëri me kompani italiane të akuzuara përtej Adriatikut si skema të organizatave të mafias.
Si rrjedhojë, vetë Veliajt mund t’i duhet të zgjedhë ndërmjet kandidimit nën hijen e një arrestimi të mundshëm dhe tërheqjes nga kandidimi në shkëmbim të lirisë. Vjeshta që vjen do të sjellë zhvillime në politikën shqiptare, por zhvillimet më të forta pritet të jenë, sërish, brenda mazhorancës. Dhe kandidatura e Tiranës do të jetë molla më e madhe e sherrit mes socialistëve.
Discussion about this post