Milionat për Kanye West/ Gazment Bardhi: Të hënën, kallëzim në SPAK ndaj Ramës dhe Gonxhes

Kreu i Grupit Parlamentar të Partisë Demokratike, Gazment Bardhi, ka njoftuar se ditën e hënë do të depozitojë një kallëzim penal në Prokurorinë e Posaçme (SPAK) ndaj kryeministrit Edi Rama dhe ministrit Blendi Gonxhja, lidhur me fondin prej 4.2 milionë eurosh të miratuar për koncertin e artistit Kanye West.

Përmes një reagimi publik, Bardhi rikujton deklaratat që, sipas tij, Edi Rama ka bërë kur ishte në opozitë, duke kritikuar shpenzimet prej rreth 1 milion eurosh për aktivitetet e organizuara në 100-vjetorin e Pavarësisë.

Sipas Bardhit, sot kryeministri po vepron me një standard të ndryshëm, duke miratuar një fond shumë herë më të lartë për një koncert privat.

Deputeti demokrat pretendon se fondi është akorduar pa procedurat e nevojshme dhe në kundërshtim me ligjin.

Ai shton se fondet e rezervës së shtetit duhet të përdoren vetëm në raste të fatkeqësive natyrore ose situatave të jashtëzakonshme dhe jo për organizimin e aktiviteteve artistike.

Në përfundim, kreu i Grupit Parlamentar të PD-së konfirmon se të hënën opozita do të dorëzojë zyrtarisht kallëzimin penal në SPAK ndaj kryeministrit Rama dhe ministrit Gonxhja, duke kërkuar hetimin e çështjes dhe sqarimin e ligjshmërisë së vendimmarrjes.

“Kur Edi Rama ishte në opozitë denonconte tre evente publike, të organizuara për festimet e 100-vjetorit të Pavarësisë, me vlerë 1 milionë euro, duke i cilësuar si abuzim me ligjin dhe një opurtunitet korrupsioni. I njëjti Edi Rama, 14 vite më pas, miraton një fond 4.2 milionë euro për një koncert privat, pa asnjë procedurë, në shkelje flagrante të ligjit, me fondet që duhet të përdoren vetëm në rastet e fatkeqësive natyrore apo masave të jashtëzakonshme.

Me standardin që ka vendosur vetë ai, Edi Rama duhet të përgjigjet penalisht për abuzimin me 4.2 milionë euro të taksapaguesve shqiptarë.

Prandaj, ditën e hënë, Grupi Parlamentar i Partisë Demokratike do të depozitojë kallëzim penal në Prokurorinë e Posacme (SPAK) kundër Edi Ramës dhe Blendi Gonxhja, të cilët duhet të japin llogari para ligjit dhe qytetarëve për abuzimin flagrant me paratë e shqiptarëve”, shkruan Bardhi.