Trupa gjyqësore e Gjykatës së Posaçme të Shkallës së Parë për Korrupsionin dhe Krimin e Organizuar (GJKKO) shpreh me dhimbje dhe indinjatë të thellë reagimin ndaj ngjarjes tragjike që ndodhi sot, ku humbi jetën në mënyrë të dhunshme gjyqtari i Gjykatës së Apelit, z. Astrit Kalaja.
Në këto momente të vështira, GJKKO i përcjell ngushëllimet më të sinqerta familjes, të afërmve dhe kolegëve të gjyqtarit Kalaja, duke shprehur solidaritet të plotë me gjithë sistemin gjyqësor.
Humbja e një përfaqësuesi të drejtësisë në mënyrë të tillë përbën një goditje të rëndë për gjithë sistemin gjyqësor dhe shoqërinë shqiptare në tërësi.
Ngjarja e sotme përbën një alarm të qartë për sigurinë ku ushtrojnë funksionin magjistratët në Republikën e Shqipërisë. Gjyqtarët janë shtylla kryesore të sistemit të drejtësisë dhe garantues të shtetit të së drejtës, ndaj siguria e tyre personale është jo vetëm një detyrim institucional, por domosdoshmëri për funksionimin normal të sistemit demokratik dhe sundimit të ligjit.
Ky akt kriminal përbën një kërcënim serioz ndaj pavarësisë së gjyqësorit, integritetit të funksionit të magjistratit dhe besimit të qytetarëve në shtetin e së drejtës. Askush që mban mbi supe përgjegjësinë për garantimin e zbatimit të ligjit nuk duhet të ndihet i pambrojtur.
GJKKO thekson nevojën urgjente për rritjen e masave të sigurisë për magjistratët dhe kërkon një reagim të vendosur institucional për të parandaluar përsëritjen e tragjedive të tilla.
Discussion about this post