Partia Demokratike ka kërkuar anulimin e tenderit për blerjen e tre avionëve për shuarjen e zjarreve, me vlerë rreth 15 milionë euro, duke ngritur akuza ndaj kompanisë së shpallur fituese.
Në një deklaratë, zëdhënësja e Antikorrupsionit në PD, Genta Vangjeli, deklaroi se kompania “Air Tractor Europe S.L.”, e përzgjedhur nga Ministria e Mbrojtjes, është përfshirë në çështje gjyqësore në Spanjë që, sipas saj, lidhen me manipulim tenderësh dhe korrupsion në sektorin e avionëve për shuarjen e zjarreve.
Sipas PD-së, vendimet e autoriteteve gjyqësore spanjolle, së bashku me një vendim të Gjykatës Supreme në Greqi në vitin 2024, krijojnë pengesa për pjesëmarrjen e kësaj kompanie në procedura të prokurimit publik.
Demokratët i referohen edhe legjislacionit shqiptar për prokurimet në fushën e mbrojtjes dhe sigurisë, duke argumentuar se operatorët ekonomikë duhet të skualifikohen në rast se janë dënuar për vepra penale si korrupsioni, mashtrimi apo falsifikimi.
PD kërkon anulimin e menjëhershëm të procedurës dhe nisjen e hetimeve nga SPAK për të verifikuar përgjegjësitë lidhur me tenderin.
Deklarata e zëdhënëses së Antikorrupsionit në PD, Genta Vangjeli:
Publikimi në media i dokumenteve dhe informacioneve mbi tenderin prej 15 milionë eurosh për blerjen e tre avionëve për shuarjen e zjarreve edhe njëherë tjetër tregon si Qeveria e Edi Ramës administron sigurinë dhe mbrojtjen kombëtare dhe si menaxhon paratë e shqiptarëve.
Sipas medias Ministria e Mbrojtjes ka shpallur fituese kompaninë Air Tractor Europe S.L., e cila është përfshirë në vendime gjyqësore në Spanjë që lidhen me manipulimin e tenderëve, dhe korrupsionin në sektorin e avionëve të shuarjes së zjarreve.
Vendimet e autoriteteve gjyqësore spanjolle, përveç dëmit korruptiv të paktën 150 milion euro, së bashku me vendimin e gjykatës supreme në Greqi në 2024, pengojnë kompaninë të marrë pjesë në procedura të prokurimit publik në vendet e Bashkimit Europian.
Në fakt edhe legjislacioni shqiptar përmban të njëjtat klauzola penalitetesh:
1. Bazuar në ligjin 36/2020 Për prokurimet në fushën e mbrojtjes dhe sigurisë, neni 38/1, AK skualifikon çdo operator kur ka të dhëna se ai është ose ka qenë i dënuar me vendim penal të formës së prerë për një sërë veprash penale përfshirë falsifikim, korrupsion; mashtrim etj.
2. DST në fushën e mbrojtjes dhe sigurisë , në shtojcën 10, për tu plotësuar nga OE pjesëmarrës dhe për tu dorëzuar pranë AK kërkon që ofetuesi nën përgjegjësinë e tij të plotë të vetëdeklarojë se nuk është dënuar për asnjë nga veprat penale të parashikuara në nenin 38/1 të Ligjit Për prokurimet në fushën e mbrojtjes dhe sigurisë .
Në këto kushte Partia Demokratike kërkon anulimin e menjëhershëm të procedurës dhe nisjen e hetimeve të thelluara nga SPAK për të penalizuar përgjegjësit.
Discussion about this post