Kryeministri Edi Rama ka reguar për vendimin e sotëm të Gjykatës së Lartë, e cila rrëzoi rekursin e kryebashkiakut të Tiranës, Erion Veliaj, për lehtësimin e masës së sigurisë dhe nxjerrjen e tij nga paraburgimi.
Sipas Ramës, “kalvari i Erion Veliajt” është një rast unik në historinë e Evropës demokratike dhe ai pretendon se ende nuk është bërë e qartë ekzistenca e një rrezikshmërie ekstreme që do të justifikonte, sipas tij, qëndrimin e zgjatur në paraburgim të një personi të zgjedhur nga qytetarët.
Kryeministri e zhvendosi vëmendjen edhe te funksionimi i kryeqytetit, duke argumentuar se mungesa e kryetarit të zgjedhur po krijon një kosto për Tiranën dhe banorët e saj.
Ai e cilësoi situatën si një “eksperiment të paparë e të padëgjuar juridik, social dhe ekonomik”, duke pretenduar se kostoja e tij po rëndon mbi afro një milion banorët e Tiranës.
Reagimi i plotë i Edi Ramës:
Përsëri Tirana pa kokë dhe përsëri kryetari i zgjedhur e i pagëzuar rishtaz nga vetë Kushtetuesja si i vetmi në detyrë dhe i palëvizshëm nga detyra, nuk mund të lëvizë nga qelia ku mbahet pa gjyq!
Po, rregulli e do që vendimet e gjykatave të respektohen dhe unë i nështrohem gjithnjë këtij rregulli – madje as nuk i komentoj vendimet përpara formës së prerë.
Por, përtej faktit që kalvari i Erion Veliajt është unikal në historinë e Europës demokratike dhe gjithashtu faktit që ende nuk shihet gjëkundi prova e rrezikshmërisë ekstreme, e cila mund të arsyetojë kyçjen e pambarimtë në qeli të një të zgjedhuri nga populli, ka një të vërtetë tjetër të hidhur:
Askush s’po do t’ia dijë për koston përditë e më të lartë të të parit kryeqytet në botë, që prej thuajse dy vjetësh jeton me kokë të prerë dhe për haraçin që thuajse 1 milionë banorë duhet t’i paguajnë përditë këtij eksperimenti të paparë e të padëgjuar juridik, social dhe ekonomik.
Discussion about this post