Humbja në El Clasico vetëm sa e ka zgjuar Real Madrid, që ka marrë fitoren e katërt radhazi dhe kryeson bindshëm në LaLiga. Sot ekipi i drejtuar nga Ancelotti mposhti me rezultatin 3-1 në transfertë skuadrën e Osasuna.
Ndeshja nisi me vrull, pasi në 13 minuta u shënuan dy gola. Fillimisht ishte David Alaba, ai i cili brenda zone nuk fali dhe kaloi skuadrën e Real Madrid në avantazh.
Një minutë zgjati epërsia, pasi Budimir shënoi menjëherë për Osasuna. Real Madrid e kishte të qartë se kjo ndeshje duhej fituar dhe në fundin e pjesës së parë Asensio riktheu epërsinë.
Reali shkoi i qetë në dhomat e zhveshjes, ndërkohë që në pjesën e dytë u akorduan dy penallti në favor të kryesuesve të LaLiga. Benzema u vu përballë Herrera dhe në 7 minuta ai ia priti francezit të dyja penalltitë.
Realit i duhej goli i qetësisë dhe mund ta shënonte me Nacho e Vinicius, por pa sukses. Në minutën e fundit shtesë realizoi edhe Vasquez, për t’u mbyllur llogaritë. Ekipi i Ancelottit mori tre pikë të tjera që e afrojnë edhe më shumë me titullin kampion. / abcnews.al
Discussion about this post