Reali i Madridit ka kryer me sukses praktikën “Athletic Bilbao”, duke triumfuar me shifrat 2-0, në stadiumin e ekipit bask.
Djemtë e Ancelottit e nisin këtë sezon me objektivin për të rimarrë titullin, e humbur sezonin e kaluar. Megjithtë, këtë vit duhet të bëjnë llogaritë me mungesën afatgjatë të portierit Courtois.
Duhet thënë se “Los Blancos” i dhanë drejtim takimit, relativisht shpejt, me Rodrygon që gjeti golin pas 28 minutash lojë.
Bilbao u hodh në sulm për të barazuar menjëherë shifrat, por ukrainasi Lunin ishte i vëmendshëm ndaj sulmeve bardhekuqe.
Në të 36’ minutë, pati festë edhe për blerjen e re të Realit, Jude Bellingham, që gjeti golin e parë zyrtar me bluzën e bardhë.
Me këtë avantazh, u mbyll fraksioni i parë i lojës. Në pjesën e dytë, vendasit, kërkuan dëshpërimisht që të shkurtonin diferencat, por maksimumi që ata bënin ishin faullet e ashpra ndaj Vinicius e Kroos.
Në fund tre pikë të arta, për mbretërorët, që e fillojnë me këmbën e mbarë, sezonin e ri, në kampionat.
Discussion about this post