Reali i Madridit do të kërkojë të festojë në mënyrën e duhur triumfin në Kupën e Botës për Klube. Në Santiago Bernabeu, “Los Merenges” do të përballen me skuadrën e Elche, që ndodhet në pozitën e fundit me 9 pikë. Trajneri i Realit, Carlo Ancelotti, duhet të bëjë llogaritë me mungesa shumë të rëndësishme, si Eden Hazard, Vinicius jr, portieri Courtois pa harruar dhe mungesën më të rëndësishme të mesfushës, gjemranin Toni Kroos.
Mungesa e Vini jr.,ndryshe nga lojtarët e tjerë të lartpërmëndur, është si rezultat i kartonit të verdhë të marrë në takimin ndaj Majorkas, në Son Moix Stadium. Porta do t’i besohet ukrainasit, Andrey Lunin, i cili, duket se ka rigjetur entuziazmin pas një periudhe ku kishte thashetheme në lidhje me një hatërmbetje me teknikun Ancelotti në lidhje me mosaktivizimin ndaj Villarreal në Kupën e Mbretit.
Duhet thënë se portieri, nuk ka dhënë shumë garanci gjatë ndeshjeve, e provuar kjo nga golat e shumtë të pësuar. Megjithatë faji nuk është komplet i ukrainasit, kjo sepse mbrojtja fut ujë nga të gjitha anët. Rudiger është një nga të indicjuarit, blerja e re e klubit nuk ka bindur deri tani, me tifozët dhe analistët që preferojnë titullar Nacho ose David Alaba, në qendër të mbrojtjes.
Në mesfushë, Tchouameni, është premtues por ka ende punë për të bërë për të arritur nivelin e kërkuar nga klubi më i lavdishëm në botë. Sonte me siguri do të jetë titullar bashkë me Modric dhe Valverde, ndërkohë që ende nuk dihet nëse do të ketë ndonjë vend titullari për Dani Ceballos. Sulmi pritet t’i besohet sonte në 21:00, francezit Benzema, spanjollit Asensio dhe brazilianit Rodrygo.
Discussion about this post