Tjetër rezultat zhgënjyes i Realit të Madridit në kampionat. Edhe pse yje të shumtë në formacion, si Mbape, Vinicius & CO, skuadra e Ançelotit nuk shkoi më shumë se barazimi 1-1 ndaj Las Palmas në duelin e vlefshëm për javën e tretë të La Ligës.
Vendasit shënuan të parët me Moleiron në minutën e 5-të, ndërkohë që Reali barazoi shifrat me Vinicius Zhunior i cili shënoi me penallti në minutën e 69-të.
Pas barazimit me Las Palmas, trajneri Carlo Ancelotti ka shpjeguar arsyen e paraqitjes së dobët të ekipit të tij.
“Nuk kam parë ndonjë përmirësim në krahasim me ndeshjen me Mallorcan.
Duhet të vuajmë pak për momentin, skuadra nuk është e ekuilibruar, nuk jemi të shpejtë në lëvizjen e topit, e kemi të vështirë ta rikuperojmë atë.
Mendoj se pjesa e parë ishte e keqe. Ne luftuam për të gjetur ekuilibrin. Nuk mund të kërkojmë justifikime, duhet të kërkojmë përmirësim të shpejtë. Po na kushton më shumë se sa pritej. Unë marr përgjegjësinë.
Kur nuk e kemi topin, ne luftojmë për të qenë kompakt, por ne lëmë hapësirë midis linjave. Unë duhet ta gjej zgjidhjen, jo lojtarët”,u shpreh ai.
Ky ishte barazimi i dytë në 3 javë për madrilenët, që duket se nuk e kanë nisur në mënyrën e duhur. Në sfidën e radhës skuadra e Ançelotit do të përballet me Betisin në shtëpi.
Discussion about this post