Milani po bën një revolucion në radhët e tij në këtë sezon dhe ka një liste me lojtarë që nuk bëjnë më pjesë në planet e klubit. Por kuqezinjtë nuk po gjejnë blerës, ose më saktësisht, destinacione të preferuara nga lojtarët që synojnë të largojnë.
Ky është rasti i Ante Rebiç, i cili nuk është grumbulluar as për turneun veror në SHBA nga trajneri Stefano Pioli. Klubi pret oferta, por sulmuesi ka refuzuar një të tillë që do të ishte shumë e rëndësishme ekonomikisht për të.
Sipas “Sky Sport”, Rebiç ka marrë në ditët e kaluara një ofertë shumë të rëndësishme nga një klub saudit, i cili i ofronte 10 milionë euro në sezon për të shkuar në kampionatin ku po paguhen shifra të çmendura. Por lojtari e ka refuzuar, duke bërë të qartë se nuk kërkon paratë më shumë se sa një projekt ambicioz në Europë.
Një situatë që ka lënë të pakënaqur Milanin, pasi ai është i tepërt në klubin italian dhe një largim i tij, do të lehtësonte kuqezinjtë edhe nga pesha e rrogës, përtej të ardhurave që do të sigurohen nga shitja e kartonit të tij.
Discussion about this post