Mëngjesi i sotëm e ka gjetur të bllokuar pikën kufitare të Jarinjës që lidh Kosovën me Serbinë pas vendimit të djeshëm të qeverisë kosovare për të vendosur reciprocitetin e targave.
Pas vendimit që hyri në fuqi ditën e djeshme, forca të shumta policie blinduan doganën e Jarinjës për të siguruar zbatimin e vendimit si dhe për të shmangur tensionet. Ashtu siç pritej dhjetëra qytetarë serbë bllokuan rrugën në afërsi të pikës kufitare të Jarinjës në shenjë proteste kundër këtij vendimi.
Kryeministri i Kosovës, Albin Kurti, tha se ky vendim u mor pas përfundimit të skadimit të afatit të marrëveshjes së lëvizjes së lirë, ndaj dhe u mendua se ishte e nevojshme një ndërhyrje e tillë.
“Nga data 15 shtator Republika e Kosovës ka ndërprerë dhënien e tabelave KS. Pesë ditë pas skadimit të afatit të paraparë për marrëveshjen e lëvizjes së lirë, MPB sot ndërmori veprimet e nevojshme për konfiskimin e të gjitha tabelave ilegale brenda territorit të Kosovës”, ka thënë Kurti.
Ndërkohë presidenti serb, Aleksandër Vuçiç ka thirrur një mbledhje urgjente të Këshillit të Sigurisë Kombëtare për të diskutuar rreth reciprocitetit të targave me Kosovën.
Pas vendimit të Qeverisë së Kosovës që të aplikojë masa të reciprocitetit, sa u përket targave të Serbisë, Shtetet e Bashkuara dhe Bashkimi Evropian u kanë bërë thirrje të dyja palëve që të ndërmarrin masa, në mënyrë që të ulen tensionet në veri të Kosovës.
