Kryetari i Aleancës për Ardhmërinë e Kosovës, Ramush Haradinaj ka kërkuar nga Qeveria e Kosovës të publikojë tekstin e marrëveshjes për targat të firmosur sot në Bruksel.
Përmes një postimi në Facebook, Haradinaj shkruan që nëse qeveria ka pranuar të trajtojë ndryshe veriun e Kosovës, kjo gjë do të sjellë pasoja të rënda në vend, pasi prek sovranitetin e shtetit. “Kërkojmë nga qeveria e Kosovës që menjëherë ta publikojë tekstin integral të marrëveshjes për targat. Nëse është e vërtetë se qeveria ka pranuar ta trajtojë ndryshe veriun nga pjesa tjetër e Kosovës, kjo për ne është krejtësisht e papranueshme dhe e dënueshme.
Karakteri unitar i shtetit nuk mund të preket.
Po ashtu, jemi të indinjuar me barazimin që i është bërë policisë speciale të Kosovës me grupet kriminale që kanë bllokuar rrugët në veri. Njëjtësimi i tërheqjes së grupeve kriminale me tërheqjen e njësive speciale të Policisë së Kosovës është ofendim dhe goditje për sovranitetin e Kosovës”, shkruan ai.
Ndër të tjera, ai shton se është e pafalshme që qeveria të lejojë KFOR të marrë në kontroll situatën në veri, duke e lënë vendin të dalë jashtë loje. Prandaj, ai këmbëngul që qeveria duhet të publikojë marrëveshjen e plotë.
“Pajtimi që KFOR të marrë nën kontroll ruajtjen e rendit në veri, kur kjo është kompetencë ekskluzive e organeve shtetërore të rendit e kur misioni i KFOR është ushtarak, është kthim prapa dhe koncesion ndaj Serbisë e me pasoja të rënda për Kosovën.
Kryeministri e ka për detyrë të sqarojë popullin për çdo detaj të kësaj marrëveshjeje dhe urgjentisht të raportojë në Kuvendin e Kosovës.
Askush nuk ka mandat të nënshkruaj kurrfarë marrëveshjeje që mund të jetë në kundërshtim me sovranitetin e vendit”, deklaron Haradinaj.
Kosova dhe Serbia arritën sot të binin në një marrëveshje për reciprocitetin e targave, pas dy ditëve diskutime.
E.H/ gijotina.com/
