Vendimi i reciprocitetit me targat serbe, ka sjellë tensione në Veri të Kosovës. Policia ka hedhur gaz lotsjellës për të shpërndarë serbët që kanë bllokuar rrugët me automjete.
Momentalisht protestuesit serbë janë tërhequr për t’u mbledhur në pika të tjera.
Pritet të ndodhin të tjera tensione në veri, sidomos në pikat kufitare, pasi qeveria e Kosovës në mënyrë surprizë vendosi sot reciprocitetin me targat dhe automjetet serbe që kur hyjnë në Kosovë të zëvendësojnë targat me ‘RKS’.
Ndërsa gjatë seancës së sotme parlamentare, kryeministri i Kosovës Albin Kurti theksoi se vendimi u mor pas përfundimit të skadimit të afatit të marrëveshjes së lëvizjes së lirë, ndaj dhe u mendua se ishte e nevojshme një ndërhyrje e tillë.
“Nga data 15 shtator Republika e Kosovës ka ndërprerë dhënien e tabelave KS. Pesë ditë pas skadimit të afatit për marrëveshjen e lëvizjes së lirë, ministria e Brendshme ndërmori sot veprimet e nevojshme për konfiskimin e të gjitha tabelave ilegale brenda territorit të Kosovës”, ka thënë Kurti.
Sipas mediave kosovare, Kurti ka thënë se pavarësisht se çfarë nacionaliteti janë drejtuesit e automjeteve me tabela jo të vlefshme, ato do të konfiskohen.
